La Xunta Xeneral del Principáu aprobo güei colos 40 votos que sumaron PSOE y PP la candidatura de José Ramón Pérez Ornia, pa qu’asina continúe como direutor xeneral del Ente Públicu de Comunicación del Principáu d’Asturies, qu’abarca la Radio Televisión del Principáu d’Asturies (RTPA). La candidatura d’Ornia, del Grupu Socialista, foi la única presentada.
Los cuatro diputaos d’IX-BA-Verdes, sin embargu, escribieron nes sos papeletes un ‘Non’ que finalmente contó como votu nulu. Escenificaron asina el so refugu, na llinia de les crítiques a la xestión d’Ornia que ya espresó ayeri’l diputáu Francisco Javier García Valledor. Previamente, aprobóse’l dictame sobre les compatibilidaes del candidatu, cola astención d’IX.
Dempués, nos pasiellos de la Xunta y en declaraciones a los periodistes, el voceru del PSOE, Fernando Lastra, mostró la so sorpresa ante la posición d’IX y dixo que se “automarxinara” en tol procesu porque nin siquiera propunxo una candidatura alternativa.