El Muséu de la Hestoria Urbana d’Avilés (MHUA) acoyía esti xueves, dende les 19:00 hores, la presentación del llibru “La mar d’Asturies”, del fotógrafu avilesín Félix González Muñiz. Recueye una colección de 150 fotografíes, captaes na so integridá na mariña asturiana, con una gran variedá de temes: regatas costeres y oceániques, trabayos portuarios, imaxes de la mariña…
El volume ta estremáu en trés secciones xeográfiques: Occidente, Centru y Oriente d’Asturies. Les imaxes que la conformen tán tomaes en diverses feches; dalgunes d’elles son frutu de la llarga trayectoria de González Muñiz, empecipiada en 1988, ente qu’otres fotografíes son nueves, realizaes específicamente para esta obra.
Félix González ye un destacáu fotógrafu especializáu en temes náutiques y marítimes, y con “La mar d’Asturies” sigue un llargu camín d’edición de llibros sobro estes materies. Yá nel añu 2014 publicó “Asturies, mariña Atlántica”, títulu al que siguieron diverses publicaciones sobro los faros de la mariña norte española y Andalucía.
La obra, como ye habitual nesti autor, cuenta cola collaboración nos testos de José Manuel Díaz, filólogu y capitán de la Marina Mercante, que va acompañar al autor na presentación d’esta nueva obra que dexa reparar la evolución temática y técnica esperimentada pol fotógrafu a lo llargo d’estos años.