El músicu estadounidense Paul Collins actúa esti sábadu 21 en Xixón nun de los sos conciertos de la xira per tol estáu. La cita ye na Sala Parque del Piles a les 22,00 hores y el programa del conciertu va ser un repasu a más de tres décades na vanguardia musical, con una parada irrefugable na so etapa como cabezaleru de los míticos The Beat.
Collins llega a Xixón con un nuevu discu publicáu de la so actual carrera en solitariu: “Flying hihg”, una recordanza viva de que’l músicu sigue dando puxu enforma a les sos canciones. El trabayu discográficu col que se presenta l’americanu ye’l primeru tres doce años ensin grabar y tres un periplu axitáu que lu llevó a embarcase en diferentes aventures artístiques y profesionales. Agora ye la ocasión de ver el resultáu d’esa llarga busca en directu.