Neños en riesgu d’esclusión van aprender a programar

P’atayar la fienda ente los neños más favorecíos y los menos, esta selmana presentóse nel Google Campus de Madrid Xenios, un proyectu d’Ayuda n’Acción y de Google.org, el brazu filantrópicu del buscador, pa enseñar Scratch un sistema del MIT que n’Asturies enseña Formanet.

La ONG escoyó 30 colexos en zones especialmente castigaes pola crisis pa que profesores n’informática enseñen a neños de 8 a 13 años los primeros pasos pa programar un ordenador. El proyectu va empezar n’ochobre n’ocho comunidad autónomes y, cola collaboración de 300 profesores, va llegar a beneficiar a más de 5.000 alumnos, según nagua’l so responsable n’Ayuda n’Acción, Jorge Cattaneo.

Nun 95% de los colexos los neños van recibir les clases nel horariu lectivu. La enseñanza va consistir en 12 sesiones d’una hora de duración pa familiarizase con Scratch, el sistema creáu pol Institutu Tecnolóxicu de Massachusetts (MIT) pa que los más pequenos empecipien na narración d’hestories.

Pa programar con Scratch basta que’l neñu escueya dellos oxetos a los que puede añedir testos y elementos que los ponen en movimientu. Depués, puede complicar la so hestoria faciendo qu’asocedan determinaos acontecimientos al interactuar dos oxetos ente sigo —por casu, cuando topeten o se crucien— ya inclusive, más palantre, complicar los algoritmos “pa repitir secuencies, faer la programación más eficientes; o incluyir bifurcaciones de la hestoria”, detalla Cattaneo.

La ONG y Google.org sofitáronse na asociación Nueves Inventores, de la que van salir el monitores de les actividaes, anque siempres el tutor va tar presente na actividá. Jorge Cattaneo detalla cómo se va desenvolver el proyectu en clase: “Vamos Empezar enseñándo-y el software a cada neñu, unu a unu, demientres cuatro hores; depués fadrémos-yos trabayar n’equipu nes siguientes cuatro y, a la fin, van intercambiar les sos hestories col restu de la clase”. D’ende van salir hestories que tamién pretenden educar en valores: cómo caltener llimpia la clase, curiáu o un ríu o la ciudá son exemplos d’estes hestories-programes incipientes.

Superar la fienda dixital ente homes y muyeres ye unu de los oxetivos del proyectu, pero tamién desmontar el sambenitu de el programadores como seres frikis y solitarios. La presentación axuntó a dellos espertos n’educación y programación en redol a una mesa de diálogu.

N’Asturies, Formanet lleva tiempu enseñando tanto Scratch como Scratch Junior. ScratchJr ye un llinguaxe d’introducción a la programación que dexa a los neños de 6 a 8 años crear les sos propies hestories y xuegos interactivos. Los neños encaxen bloques de programación al pie de gráficos pa faer personaxes que se mueven, salten, baillen y canten. Los neños pueden modificar calteres nel editor de pintura, añedir les sos propies voces y soníos, inclusive enxertar semeyes . Utilicen los bloques de programación pa faer que los sos personaxes cobren vida.

ScratchJr inspirase nel llinguaxe Scratch, utilizáu por millones de xóvenes (de 8 años p’arriba) en tol mundu. Na creación de ScratchJr, rediseñose l’idioma de la interfaz y la programación pal desenvolvimientu de los neños más pequenos.