Manhattan celebró unes xornaes dedicaes a la cultura asturiana

El Centru Español de Manhattan, asitiáu na célebre islla de Nueva York, foi’l llugar escoyíu pa la celebración d’unes xornaes de cultura asturiana curties pero intenses el domingu 18 de marzu, dende les seis y media la tarde hasta les once la nueche. Los actos aprovecharon la presencia en Nueva York de la Banda de Gaites de Corvera, dirixida por Bras Rodrigo, por cuenta del desfile de San Patriciu, la escritora y profesora asturiana Paquita Suárez-Coalla, asentada en Nueva York va diecisiete años, y Marta Zapardiel, del Centru Español, organizaron esti alcuentru cultural con acentu asturianu.

La xornada fizo un percorríu pela hestoria, cola charra de Chema Vega sobre’l “Camín Primixeniu del Camín de Santiagu”, l’asturianu, cola llectura del llibru de Paquita Suárez Coalla, “Camín de Lletres”, ganador del último premiu María Xosefa Canellada, y de la música asturiana, cola actuación de Bras Rodrigo a la gaita, cola que se peslló un actu qu’algamó a xuntar un centenar de persones.

L’actuación enforma espectacular de Kristina Varade, del Niall O’Leary School of Irish Dance, de Nueva York, contribuyó a que n’esta xornada astur-neoyorquina, y gracies al contestu mesmu d’esta ciudá, s’estrecharan fácilmente llazos ente estes dos cultures –l’asturiana y la irlandesa– que tantes coses tienen en común. Pa celebrar l’alcuentru, y gracies al sofitu de la Xunta Xeneral del Principáu, de Caxastur y de la tienda gourmet de productos asturianos de Nueva York, Despaña, tolos asistentes a l’actividá foron convidaos a una espicha nel mesmu Centru Español.