Los conseyeros d’IX Asturies amuesaben esti día nuna nota de prensa “el so desalcuerdu cola suspensión de la xunta del Conseyu d’Alministración de la radio y televisión pública del Principáu, RTPA, cola escusa de la entrada a valir de la nueva llei del sector públicu” y reclamen la convocatoria de la xunta que taba prevista pa esti llunes. Tamién espresaben el so “malestar poles formes en que suspendieron l’alcuentru, por aciu un corréu electrónicu”.
Los conseyeros de la coalición envaloren qu’esa xunta podría celebrase igualmente anque fora con calter informativu pa conocer la nueva situación y organización del ente públicu, amás del calendariu de formalización del nuevu ente públicu, deriváu de la puesta en marcha de la nueva llei. Los conseyeros d’IX sostienen que cuidando que la RTPA sigue funcionando y calteniendo la dirección anterior, sería lóxico caltener la convocatoria y que nesta s’ufiertaren esplicaciones.
Los conseyeros d’IX na RTPA atalanten que l’anulación de la xunta “tien enforma que ver col amenorgamientu de la representación política alcordada y aprobada colos votos del Partíu Popular y del PSOE y el cambéu que torga a los miembros de les executives de los partíos tar presentes nel Conseyu d’Alministración”.
Per otru llau, los conseyeros d’IX recuerden que son, dende va dellos años, los únicos qu’arrenunciaron a les dietes.