Les families asturianes gasten 262 euros al añu n’educación, trés vegaes menos que Madrid, según les cifres recoyíes nel Informe 2019 del Conseyu Escolar del Estáu. Solo otres dos comunidaes presenten un peor índiz: Canaries, con 233,3 euros y Castiella La Mancha, con 238,1.
Alvertía fai yá dellos años el Conseyu Escolar del Principáu d’Asturies que les families del país vieren minorada la so capacidá pa encarar los gastos corrientes, ente ellos tamién los rellacionaos cola educación de los sos fíos. Y eso tenía que ser compensáu por un esfuerzu de los poderes públicos». Aquella radiografía de va cinco años sigue vixente. Porque les families asturianes siguen a lo cabero del país nel so gastu n’educación: 262,4 euros añales.
Estos 262 euros ye la cifra que los llares de la rexón destinaron a esi ámbitu en 2018, según les cifres recoyíes nel Informe 2019 del Conseyu Escolar del Estáu. Solo otres dos comunidaes presenten un peor índiz: Canaries, con 233,3 euros y Castiella La Mancha, con 238,1. Ello ye que solo hai seis comunidaes que tean per debaxo de los 300 euros d’inversión. Al pie de Asturies, Canaries y Castiella-La Mancha, tán Castiella y Llión, Estremadura y Cantabria.
La cifra asturiana llama entá más l’atención si se compara coles primeres del ranking nacional. Asina, les families asturianes gasten trés vegaes menos que les madrilanes, onde la cifra ye de 774,7 euros. La segunda con una mayor inversión añal ye Cataluña, con 668,6 euros.
Los númberos estrainse de la Encuesta de Presupuestos Familiares que l’Institutu Nacional d’Estadística realiza dende 1997 y que dende 2016 afaise a la clasificación europea, qu’ameyora la estadística y qu’incorpora, por casu, el gastu al traviés d’internet. Sía como fora, lo cierto ye que va años qu’Asturies nun sale de los postreros puestos, magar que en los trés últimos exercicios el gastu aumentó.
Pero, tal que dicía’l Conseyu Escolar del Principáu d’Asturies, el baxu presupuestu familiar compensase cola alta inversión pública. D’esta forma, la comunidá ye una de les que rexistra un mayor gastu públicu por alumnu. Les últimes cifres oficiales, recoyíes nel mentáu informe del Conseyu Escolar del Estáu, dicen que n’Asturies esi gastu ye de 5.814 euros, solo superaos per País Vascu, Cantabria y Navarra.
Nun se trata solo de cifres y númberos, estadístiques ya informes, sinón que la inversión n’educación inflúi nel rendimientu. Según los últimos datos de PISA, el mayor analís educativu internacional, xuna mayor inversión equival a unos meyores resultaos.
Pero Asturies, y el conxuntu del país, suspenden tocantes a los mínimos que se consideren aparentes. El Conseyu Escolar del Estáu alvertíalo: desque empezó la crisis, l’esfuerzu que les alministraciones faen nesta área viose amenorgáu de forma notable, cuando lo aconseyable, según tolos encamientos internacionales, ye «dexar la educación al marxe de los axustes presupuestarios, priorizándola como inversión de futuru». El Conseyu Escolar pide, ello ye que «la inmediata corrección de la situación deficitaria esistente, recuperando los niveles d’inversión educativa previos a la crisis económica». L’oxetivu estatal ye algamar, siquier, el 5% del PIB (España taba en 2009 nel 4,99%), anque la Unión Europea fala del 6% «y d’algamar al mediu plazu el 7 % de PIB pa educación».
Según el mesmu informe, Asturies gastó en 2018 n’educación 757 millones d’euros, lo que supunxo un 18,2% respectu al presupuestu de gastu públicu total. Si analizamos les cuentes públiques previstes pa 2020, el gastu n’educación va ser d’unos 798 millones (incluyendo universidá), lo que supondría un 3,4% del PIB rexonal. Llueñe, poro, d’esi 5% que’l presidente, Pedro Sánchez, afitóse como oxetivu, nel discursu de investidura, a algamar a la fin de la llexislatura. Asturies tendría que sumar bastantes millones al presupuestu de la Conseyería d’Educación pa llegar a esos niveles aparentes d’inversión.