L’Academia de la Llingua Asturiana aconceyó colos sindicatos d’enseñanza pa tratar del allgamientu de la llingua asturiana na edicación primaria. Nel alcuentru participaron representantes de CCOO, FETE-UXT y SUATEA. Les entidaes coincidieron dafechu en refugar la propuesta curricular por incumplir la Llei d’Usu al plantegar como alternativa a les clases d’asturianu otros conteníos de calter curricular.
Los sindicatos y l’ALLA reclamaron nel conceyu cellebráu ayeri que l’alministración educativa “igüe la propuesta curricular pa que los escolinos y escolines qu’escueyan l’asignatura de llingua asturiana nun sean discriminaos en cuantes a la so formación educativa”.
L’Academia amuesó’l so sofitu a los sindicatos na petición de creación d’una mesa de negociación que ponga les bases pa “finar cola situación d’indefensión de l’asignatura” y “estabilizar al profesoráu qu’imparte la meteria”.
Pa finar l’Academia y los sindicatos CC.OO, FETE-UXT y SUATEA pautaron caltener xuntes y aconceyamientos periódicos p’axuntar esfuerzos nun tema “de tanta trescendencia pal futuru de la llingua y la enseñanza n’Asturies”.