Coincidiendo col día nel qu’entrega en Xixón los Premios Andrés Solar, la Xunta Pola Defensa de la Llingua protagonizó l’espaciu “Nós” qu’emitió la TPA a partir de les 12 de la mañana d’esti sábadu 20 de Xineru. Nel programa, que dirixe y presenta Próspero Morán, fízose un percorríu pela sé de la organización y pola so historia y actividaes alrodiu de la promoción y la normalización de la Llingua Asturiana.
La sesta entrega d’esta temporada, qu’entamó’l primer sábadu de Payares n’Ibias, componse de 30 capítulos de 10 minutos de duración caún realizaos íntegramente n’asturiano. L’espaciu vien superando’l 10 por cientu d’audiencia en dellos programes d’esti añu y algamó na primer temporada una cuota media del 8,2%, que superaba en cásique un puntu al promediu actual de la cadena, un 7,4%, según datos facilitaos por Taylor Nelson Sofres (TNS).
Nos emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.