La Xunta Pola Defensa de la Llingua denunció güei d’un comunicáu que’l colexu públicu Ríu Piles de Xixón enfrenta l’asignatura de Llingua Asturiana a la de Llingua Señes, dao que los alumnos que cursen una nun puen elixir la otra.
Según la Xunta, “nesti centru impártese la Llingua de Señes, emplegada por persones con dispacidaes auditives, como asignatura alternativa d’asturianu, tornando pela vía de los fechos al asturianu nuna asignatura optativa, en vez d’una voluntaria, como ta establecío per Llei nel testu del currículu d’Enseñanza Primaria”.
Aludiendo a la Llei de Promoción y Usu, la Xunta recordó que “ésta impide espresamente que l’estudiu de la ‘llingua’ puea competir con otres materies, pa evitar la discriminación de los alumnos que la escueyen, al non tener accesu a la mesma formación qu’aquellos que nun la escueyen”.
La Xunta señaló la “responsabilidá de la Conseyería d’Educación nestos casos, y que la inspeición educativa nun actúa nestes maniobres, que cuenten cola aprobación de la Conseyería”.