La Sociedá Española de Derechos d’Autor (Seda) foi autorizada esta selmana pa operar como entidá de xestión colectiva de derechos d’autor sobro obres musicales, colo que la Sgae pierde’l so monopoliu n’autoría musical.
Según informó la nueva entidá de xestión, el Ministeriu de Cultura y Deporte resolvió’l procedimientu de solicitú d’autorización pa operar como entidá de xestión n’España plantegáu por Seda, lo que supon que ponse fin “a cien años de monopoliu de la Sgae”.
L’autorización supon que Seda presentó “un plan de viabilidá que-y dexará asegurar la eficaz alministración de los derechos que la so xestión sía-y encamentada en tol territoriu español”, según lo previsto nel artículu 147 del testu refundíu de la Llei de Propiedá Intelectual.
A finales del pasáu añu Manuel Reciu Patacho, unu los promotores d’esta entidá, yá anunció la intención d’autores y editores de música de formar parte d’una nueva entidá que solo xestionara derechos d’autor de músicos y editores, lo qu’hasta agora nun esistía.