Esti xueves, 26 de Payares, a les 20:15, la Orquesta Sinfónica del Principáu d’Asturies (OSPA) volverá xubise a les tables del Teatru Palacio Valdés.
El nuevu conciertu incluyíu nel ciclu Música n’escena”, de la temporada ochobre-avientu’15 de escenAvilés preseta a la OSPA que va interpretar el programa “Aurores Boreales I”, dirixíu pol maestru Milanov, y nel que va cuntar col pianista Ludmil Angelov.
El programa inclúi obres como “Cielu d’Iviernu”, de la compositora finlandesa Kaija Saariaho, que la mesma Orquesta Sinfónica del Principáu d’Asturies estrenara la xornada anterior nel Teatru Campoamor d’Uviéu. Al pie de “Cielu d’Iviernu”, la OSPA va interpretar tamién el Conciertu pa pianu nº1 nel mio menor, op. 11 de Chopin, y la suite “Lleendes” de Sibelius. Les entraes p’asistir a esti espectáculu tienen un preciu únicu de 18 euros.