La FSA asumió esta fin de selmana la reivindicación de la oficialidá del asturianu cola aprobación pol 52% de la enmienda de Socialistes pola oficialidá que fuera presentada y aprobada previamente en 23 agrupaciones.
Socialistes pola oficialidá, grupu de militantes y cargos de la FSA-PSOE esmolecíos pol futuru del asturianu y la necesidá de reconocer la oficialidá del idioma, que punxo en marcha y movilizó esta enmienda al Programa Marcu felicita a tol partíu por esti cambiu de postura hestóricu y que pon a los socialistes asturianos del llau de la defensa de los drechos llingüísticos y la cultura asturiana.
La enmienda, defendida por María Luz Pontón, militante d’Uviéu, consiguió facese con más del 52% d’apoyos, frente al 31% del non, y un 11% d’abstenciones, dempués de llegar al Congresu col apoyu de les agrupaciones que representen al 75% de la militancia. Y
Pal grupu de militantes, tar pola oficialidá ye pal PSOE lo natural y entra dientro de les sos señes d’identidá “na defensa y el reconocimientu de los drechos y de la plena igualdá xurídica de tolos ciudadanos y ciudadanes”. Por eso güei nun podemos maś que celebrar esta xornada hestórica pa la llingua asturiana y pal partíu, que se suma al consensu social a favor de da-y futuru a la llingua asturiana. “Los socialistes somos exemplu en toles comunidaes autónomes con llingües propies y agora, cola defensa de la oficialidá, atopamos la solución afayadiza pal idioma, que nun ye otra que la marca la Constitución”.