El grupu de folk l.lenizu, La Col.lá Propinde, va empezar la so xira de branu del so nuevu discu, el prósimu vienres día 14 de xunetu, nes fiestes del Carmín en La Pola Siero. Esti trabayu que lleva por títulu Güeria foi espublizáu a finales del añu pasáu cola presentación del mesmu nel Teatru Vital Aza de La Pola L.lena. El conciertu d’esti vienres va tar dedicáu a la memoria d’Irgor Medio y Carlos Redondo, miembros del grupu Felpeyu colos que La Col.lá diba compartir escenariu nesi mesmu día.
El segundu discu de La Col.lá Propinde cuenta con abondes collaboraciones d’otros músicos asturianos, como ye’l casu d’Esther Fonseca, nel canciu que lleva por nome ‘Alcordances’. Precisamente nesti conciertu la banda l.leniza va convidar a Fonseca a xubir al escenariu con ellos.
Otros de los collaboradores d’esti album son Delfo (de La Tarracha y K-Nalón), Lafu y Ramón de Los Berrones.
La nueche folk de La Pola Siero va empezar sobre les once de la nueche y completa’l so cartel cola presencia de los grupos asturianos DRD, Los Llanzones y Los Gatos del Fornu, ente otros.