El coordinador xeneral d’Izquierda Xunida, Jesús Iglesias afirma que la oficialidá “ye la última batalla pal asturianu y paga la pena pelear”. Pal responsable de la coalición d’izquierdes la reforma del estatutu ye la ocasión onde se espeya esta última oportunidá pa la llingua asturiana y el nun facelo, al so xuiciu, diba suponer “qu’en mui poco tiempu vamos tar falando d’una llingua muerta”.
Iglesias fizo estes declaraciones nuna entrevista que publica la edición d’esti martes 26 del diariu La Nueva España. Na entrevista tamién se refier a la propuesta llanzada por IX pa entamar el debate sobre la reforma estatutaria n’Asturies. El coordinador de la coalición anuncia qu’a partir de xineru van escomenzar a recoyer opiniones de los distintos axentes sociales sobre esti debate.
Tocante a la oficialidá de la llingua asturiana, Jesús Iglesias atribúi les rocees del PSOE a “prexuicios y pantasmes” y caltién qu’anguañu hai un clima más afayadizu pa sentar a discutir de la reconocencia llegal del nuestru idioma: “nos últimos tiempos, el debate serenóse y mesmo se dieron pasos na Xunta (Xeneral) pa despolitizalo, por eso veo más esperances de que sea posible afrontalo de manera racional”, diz el coordinador d’IX, pal que nun hai que poner llendes al debate y, según afirma: “los plazos y el mou de la oficialidá pueden discutise”.