El conceyal d’Economía y Tresformamientu Dixital del Conceyu d’Uviéu, el popular Javier Cuesta, axuntóse esta selmana pasada con representantes de l’Asociación Espacios Xitanos Socioculturales Mistos, que realicen actividá de vienta ambulante, pa estudiar la situación actual del Mercáu del Fontán, tocantes a les condiciones de vienta establecíes poles autoridaes sanitaries pa evitar l’espardimientu del coronavirus.
Tres la xunta, el conceyal popular manifestó “la total voluntá del Conceyu d’Uviéu y de la área que dirixe de collaborar coles distintes asociaciones de vienta ambulante por que la so actividá pueda siguir afaciéndose a los protocolos de seguridá ya hixene establecíos poles autoridaes competentes en materia de salú”, y recordó que se trata d’un sector que sufrió de manera importante l’impactu de la pandemia, polo que dende’l Consistoriu nun podemos más que ponenos del so llau por que se recuperen cuanto antes”.
Cuesta recordó, amás, que se trata d’una actividá que sostien a un importante númberu de families, en redol a un centenar, y que dalgunes d’elles tienen esta actividá como únicu mediu de vida”.