La organización de defensa del idioma Iniciativa pol Asturianu vieno acabante d’abrir el plazu de matrícula nos niveles básicu 1 y 2 de la modalidá a distancia de los sos cursos de llingua asturiana, calteniendo’l periodu d’inscripción abiertu hasta’l 29 de setiembre.
Iniciativa pol Asturianu abrió esti miércoles el plazu de matriculación p’apuntase a los nuevos cursos de llingua asturiana (nivel básicu 1 y nivel básicu 2) que van facese a distancia, al traviés d’una plataforma dixital. Los cursos van tener una duración de 36 hores llectives y van entamar el llunes 1 d’ochobre y van acabar a mediaos d’avientu. La modalidá a distancia favorez la auto organización del alumnáu y permite-yos dir faciendo les actividaes según l’horariu de caún, de manera mas conveniente.
El nivel inicial ta empobináu a persones ensin conocimientos d’asturianu o con nivel baxu de conocencia. El nivel II ta empobináu a persones con una conocencia más fonda del idioma, que yá ficieren dalgún cursu enantes. En dambos casos, les persones que lu superen van algamar un diploma de l’Academia de la Llingua Asturiana.
El preciu de la matrícula ye de 60 euros. Les persones asociaes d’Iniciativa pol Asturianu van beneficiase d’un descuentu y solo tienen qu’abonar 50 euros. Toles persones interesaes pueden asociase nel momentu de la matrícula y disfrutar d’esti descuentu.
Les inscripciones pal cursu pueden facese nun formulariu na propia páxina d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba’l 29 de setiembre.