El cantante británicu Elton John asegura que’l presidente rusu, Vladimir Putin, llamolu por teléfonu dempués de que-y pidiera ser más tolerante colos derechos de los homosexuales.
“Gracies presidente Vladimir Putin por ponese en contactu y falar conmigo güei per teléfonu”, escribió’l compositor na rede social Instagram, onde publicó una fotografía de Putin. “Espero poder axuntame de frente con usté p’aldericar la igualdá del colectivu LGBT (llesbianes, gais, bisexuales y transgénero) en Rusia”, amestó.
El Kremlin nun confirmó si realmente producióse la llamada y l’axente de prensa de John, Fran Curtis, esplicó a dpa que nun tenía más información sobre lo publicao pol cantante en Instagram. Primeramente la web estadounidense BuzzFeed citó a Curtis diciendo: “Tolo que sé nesti momentu ye que Putin llamó a Elton John”.
L’artista dixo’l domingu en Kiev, capital d’Ucrania, que quería falar con Putin y persuadilu pa que sía más tolerante.En Rusia entró a valir en 2013 una llei que penaliza les espresiones positives sobre la homosexualidá en presencia de menores d’edá.