El XXXVI Certame Coral Villa d’Avilés, que va celebrase’l sábadu 23 y el domingu 24 na Casa la Cultura, amonta hasta seis el númberu d’agrupaciones participantes con corales d’Asturies, Pontevedra, Madrid, Burgos y Cantabria. Na tercer edición del Festival Coral Infantil van actuar cuatro coros d’Avilés, Mieres, Llanera y Xixón.
El Certame Coral Villa d’Avilés algama la so XXXVI edición y amonta’l númberu d’agrupaciones participantes. Unu de los acontecimientos culturales de mayor tradición de la ciudá, entamáu pola Agrupación Coral Avilesina y la conceyalía de Cultura, va cuntar con seis mases corales, una más que l’añu pasáu, que van optar a faese colos 2.000 euros y el troféu del primer premiu, que lleva’l nome del Conceyu d’Avilés.
Va Tener llugar nel Auditoriu de la Casa de Cultura en dos xornaes, el sábadu 23 de payares a les 19 hores, y el domingu 24 a les 12 hores, en que se va celebrar la tercer edición del Festival Coral Infantil, nel que participen cuatro coros asturianos.
Foi presentáu por Yolanda Alonso, edil de Cultura d’Avilés, y representantes de la coral avilesina: Fernando Álvarez Balbuena (presidente), David Pérez (director de la coral y secretariu del certame), María Coto (secretaria), Fernando Tovar (tesoreru), Rosa Rodríguez y Alexis Fernández (vocales).
Alonso reseñó la importancia y tradición de la música coral n’Avilés, y l’esfuerzu conxuntu realizáu pola conceyalía y l’Agrupación Coral Avilesina por aumentar nesta edición el númberu de participantes, llegaos d’Asturies, Galicia, Castiella y Léon, Madrid y Cantabria.
Les agrupaciones corales que van competir nel XXXVI Certame Coral Villa d’Avilés son les siguientes:
1. Obradoiro vocal “A Vila”, de Ponteareas, Pontevedra.
2. Alaia Ensemble, de Madrid.
3. Interludiu, de Burgos.
4. San Félix, de Llugones, Asturies.
5. Mozos Cantores de la Fundación Orquesta y Cámara de Madrid (ORCAM), de Madrid.
6. Coru Nuevu de Santander.
L’III Festival Coral Infantil conformar les siguientes cuatro formaciones de neñes y neños d’Asturies:
1. Corín EM Mieres.
2. Coru de la Fundación de Música d’Avilés.
3. Coru Pequecantores de Llanera.
4. Coros del Conservatorio Profesional de Música y Danza de Xixón, Xuvenil y de Voces blanques.
Les entraes, a un preciu únicu de 5 euros pa caún de los díes del certame, podrán adquirise na Cafetería Esterior del Hotel 40 Nudos los díes 14, 19 y 21 de payares, de 18 a 20 hores. Y los díes 23 y 24, dende dos hores antes del entamu, na taquilla de la Casa de Cultura.