El Coru de la Fundación Príncipe d’Asturies y el sellu discográficu RTVE-Música acaben d’estampar un nuevu volumen de la colección dedicada a los premios de la institución. La obra recueye’l conciertu de pieslle de la XIV Selmana de la Música cola interpretación de la Misa de Requiem de Giuseppe Verdi.
L’actuación, rexistrada agora nun doble CD, celebróse’l pasáu 20 d’ochobre de 2005 nel Auditoriu d’Uvièu embaxo la dirección de Jesús López Cobos y xunta’l Coru de la Fundación cantaron les voces del Orfeón Donostiarra, acompañaes pola Orquesta Sinfónica de Principáu d’Asturies (OSPA). El repartu xuntó a cuatro de les meyores voces d’anguaño como la soprano Idra Thomas, la mezzosopranos Luciana D’Intino, el baxu René Pape y el tenor Roberto Aronica.