Una tarde al mes el Botánicu treslladase al centru de la ciudá con esti ciclu de charres divulgatives qu’esti día primeru de xunu na Escuela de Comerciu va tener a los nenúfares como protagonistes. Una nueva redolada de diálogu cola sociedá para encetar, de forma senciella y amena, los nuesos venceyos coles plantes, el medio ambiente y la biodiversidá al traviés de la lliteratura, l’arte, la ciencia y la xardinería.
Los nenúfares, ensin dulda, llogren ser el centru d’atención de cualquier xardín, apenes tienen enfermedaes y nun riquieren de grandes cuidaos. Sicasí, entá nun tán dafechu utilizaos en paisaxismu nel nuesu país. Por ello Tomy Escribán quier espertar nel públicu asturianu la so pasión polos nenúfares y demostrar lo senciellu que puede ser cultivalos en cualesquier parte d’España.
Nesta charra va faer una curtia repasada poles distintes variedaes y especies de nenúfares ornamentales anguaño en cultivu, y va enseñanos cómo reproducilos llantalos ya hibridalos con ésitu y poco dineru. Tres cuarenta años dedicáu al cultivu y caltenimientu d’estes plantes, va enseñanos trucos y conseyos útiles para poder tener un nenúfar inclusive nel balcón de la nuesa casa. Va Complementar la so charra con una amuesa de flores y fueyes seques cortaes trayíes dende’l so xardín.
Escuela de Comerciu
1 de xunu de 2022 a les 19 hores.