Colombres ye’l Pueblu Exemplar de 2015 por caltener y arriquecer el legáu de los emigrantes asturianos y convertir la emigración “nun elementu dinamizador de la cultura, la economía y la sociedá”.
La capital de Ribedeva destaca, sobremanera, pola so hestoria d’emigración y tamién pola del regresu d’aquellos que se colaron a ‘faer les Américas’. Precisamente, el títulu de la so candidatura pal galardón yera ‘Colombres y el so pasáu indianu’. Nesta localidá alcuéntrase la Fundación Archivo d’Indianos – Muséu de la Emigración, allugada na Quinta de Guadalupe, monumentu que foi construyíu pol emigrante a México Íñigo Noriega a principios del sieglu XX. Esta Fundación tien como oxetivu promover, incentivar y promocionar les actividaes rellacionaes col estudiu, investigación y documentación sobre’l fenómenu de la emigración española a América.
Colombres impúnxose a otres 17 candidatures nes deliberaciones que tuvieron llugar esta mañana y ye’sustitutu de Boal, Pueblu Exemplar de 2014. La villa foi declarada Bien d’Interés Cultural pol Gobiernu autonómicu en 2013 col principal argumentu de les sos cases d’indianos.