El conceyal de Cultura, José Luis Costillas, y el director artísticu del Festival de les Artes Escéniques, Arte y Cultura en Familia, José Castellanos, presentaron esta selmana’l Festival CAFCA, que se va desenvolver los díes 25, 26 y 27 en dellos allugamientos como l’Edificiu Históricu de la Universidá d’Uviéu, la Fábrica d’armes de la Vega, los Xardinos de la Rodriga, la Filarmónica o la plaza de la Escandalera.
El conceyal de Cultura, José Luis Costillas, presentó nel salón de plenos, el Festival CAFCA, el Festival de les Artes Escéniques, Arte y Cultura en Familia, “qu’estrenamos l’añu pasáu y esti 2021 vuelve con más actividaes, más localizaciones distribuyíes por munchos barrios y más creatividá, si quepe, que na so primer edición”, indicó. Van Ser casi 20 espectáculos “partíos en trés díes para esfrutar en familia de la cultura y l’ociu n’Uviéu, coincidiendo, amás con una fecha señalada que ye’l fin de cursu escolar. Utilícense nuevos espacios que esparcen actividaes para entretenese colos nuesos pequeños y los nuesos mozos por tola ciudá. L’Edificiu Históricu de la Universidá d’Uviéu, Fábrica d’armes de la Vega, Xardinos de la Rodriga, teatros como la Filarmónica o’l teatru de Pumarín, Plaza Porlier, Fachada del edificiu de Caxastur en La Escandalera, parque de Santullano, Teatinos frente al centru comercial Los Praos, plaza de la catedral. Concebimos esti Festival d’esta manera na llínea que marquemos en Cultura de siguir descentralizando los espectáculos y sacalos de los teatros para averala a los barrios y a los ciudadanos.”, señaló’l conceyal, que tamién destacó “la importancia de llegar a responsabilidaes polítiques para asumir retos, y el míu al mandu de la Fundación Municipal de Cultura enxamás sería dexar que tou siga igual, cola inercia d’años y años de programaciones ensin novedaes reseñables”.
“El Festival CAFCA va enllenar d’allegría y de color la nuesa ciudá mientres trés díes máxicos, con talleres p’aprender, con espectáculos que yá van consolidase como seña d’identidá d’esta actividá, como ye la Danza Vertical de baillarines sobre la fachada del edificiu de Cajastur na Escandalera, una auténtica oda a la guapura. Tamién podrá aprendese música clásica d’una manera distinta, nun cuentu, que va llevar a siete músicos d’Uviéu Filarmonía al monte encantáu de los Xardinos de la Rodriga pa rellatar la Hestoria d’un soldáu’, con música de Stravinsky. Estrenu absolutu nel CAFCA, xuntu cola actuación del músicu Igor Pascual na Fábrica d’Armes nel so viaxe al traviés de la música de tolos tiempos”, aseguró Costillas.
Acompañó al conceyal el director artísticu del CAFCA, José Castellanos, qu’hai desglosado el programa, “compuestu de 36 actividaes, porque dalgunes tienen más d’un pase polos aforos”. “Espresión artística alternativa, pa tolos públicos y na cai” son les trés premises sobro les que pivota CAFCA, indicó Castellanos.