El cantautor estadounidense Bob Dylan ganó esti xueves el premiu Nobel de Lliteratura 2016, nuna decisión arrodiada pela polémica, por tratase del primer músicu en ser escoyíu nesta categoría y pol escaecimientu de dalgunos de los grandes nomes de la lliteratura norteamericana de la segunda metá del Sieglu XX.
L’Academia Sueca, la encargada de faer l’anunciu, dixo que reconoció a la estrella del rock de 75 años por “crear nueves espresiones poétiques dientro de la gran tradición del cantar estadounidense”. Sara Danius, secretaria permanente de l’Academia Sueca, dixo de Dylan que “mientres 54 años tuvo inventándose a sigo mesmu”. De “Blonde on Blonde”, el so séptimu discu d’estudiu, Danius dixo que ye “un estraordinariu exemplu de la so brillosa manera de rimar, de xuntar refranes, de la so brillosa forma de pensar”.
Dylan, que’l so verdaderu nome ye Robert Allen Zimmerman, nació en 1941 y empezó la so carrera musical en 1959, tocando en cafeteríes de Minnesota, EE.XX. Algamo en 2007 el Príncipe d’Asturies de Les Artes compitiendo xunta artistes como María Joao Pires, pianista portuguesa, Andrew Lloyd Weber o la de los arquitectos Frank Gueri y Rafael Moneo.
El cantautor Toli Morilla, ún de los representates más esitosos de la música asturiana danguaño, sacó en 2009 al mercáu Diez cantares de Bob Dylan n’asturianu, un trabayu que define como «dalgo natural» pola influencia que siempre tuvo’l músicu norteamericanu nel so llabor compositivu. Nel discu apaecen temes como «Sara» o «Knockin’ on heaven’s door», con dellos cambios autorizaos pola discográfica de Dylan