Na sala de conferencies del CMI Atenéu la Calzada, díes 6 y 20, y nel Café de Macondo (Plaza de la Habana 3), los díes 27 d’ochobre y 7 de payares va celebrase un Ciclu d’alderiques col títulu “Quo vadis, Europa?”.
Dende la Sociedá Cultural Xixonesa y l’Atenéu Obreru de Xixón, en collaboración cola Fundación Municipal de Cultura nel CMI Atenéu La Calzada, quieren llevar la reflexón sobro l’actual situación política, económica y social d’Europa a los homes y muyeres del barriu de La Calzada y de Xixón.
Al traviés de cuatro charres y alcuentros con espertos y con activistes quieren entender qué pasa n’Europa, tres los cambeos que supunxo la crisis financiera y política. Anguaño los acontecimientos n’España recuérdennos que vivimos tiempos convulsos a los que nun ye ayena la Unión Europea: el Brexit, l’ascensu de la estrema derecha y la radicalización política, la llegada de refuxaos, el terrorismu… Ello ensin dulda tien de faenos replantegar la nuesa visión de la redolada.
Por mor d’ello van intentar abrir una lluz pa entender la realidá más allá de lo que nos cunten los grandes medios de comunicación y con una participación activa de la ciudadanía.