La Biblioteca d’Asturies n’Uviéu va acoyer hasta’l 15 d’Avientu l’amuesa espositiva XXV años de producción y edición fonográfica, una esposición que repasa prácticamente toles ediciones discográfiques editaes a lo llargo d’estos venticinco años en diversidá de soporte per parte de los trés sellos que formaron, y entá formen, parte importante de la hestoria de la música creao y editao n’Asturies: El Cohete Producciones, Waco Records y Aris Música.
Dende’l pop inmaculáu ya imperecederu de Los Locos editáu al traviés d’El Cohete Producciones pasando poles ediciones de Kactus Jack, Smellie Fingers o Y-330 pa Waco Records, pieces bien representatives de la meyor escena underground que se xeneró n’Asturies nos años noventa (bautizada como Xixón/Asturies Sound), hasta delles de les referencies más relevantes del grupu Texedor editaes yá na división Aris Música, lo mesmo que la última edición publicada hasta la fecha (de casualidá la música más antigua del catálogu), obra del Coru de les Monxes Benedictines de San Pelayo d’Uviéu, más conocíu como Les Pelayas.