Xuventú Asturianista celebra que’l TC faiga cumplir la Llei d’Usu y espera qu’impulse’l reconocimientu de la oficialidá

Xuventú Asturianista (Mocedá del PAS-Unión Asturianista) posicionóse güei alredro del autu del Tribunal Constitucional, que decidió refrendar la Llei d’Usu. La organización cree que “ye un avance dempués de munchos años de reivindicación llingüística y qu’esto ocurre dellos años dempués de l’aprobación la única base llegal de la llingua asturiana, la Llei d’Usu y Promoción”, que recuerden “consiguióse gracies al alcuerdu del PAS col entós presidente d’Asturies, Sergio Marqués”.

Xuventú Asturianista diz nun entender les declaraciones de la señora Migoya, Conseyera d’Alministraciones Públiques nes que comentó que “l’Alministración siempres admitió escritos n’asturianu” cuando “hai que recordar qu’esta Llei foi pisotiada de contino pol PSOE y ninguneada por IU” y que los gorbiernos d’estes formaciones “lleven 12 años ensin da-y desenrrollu normativu, que permita la so aplicación”.

Xuan Pandiella, voceru de la organización, comentó nun entender “como una persona asina, miembru del PSOE y del Gobiernu, tan hostil al reconocimientu de los drechos llingüísticos de los asturianos, tenga mieu a dicir la verdá, cuando tovía va un par de meses un ciudadanu foi humilláu por usar l’asturianu énte l’Alministración”.

Dende Xuventú Asturianista feliciten al ciudadanu afectáu pol incumplimientu de Llei d’Usu, Xurde Blanco, pol autu del TC que-y da la razón, y esperen “que sirva esta decisión p’algamar l’estatus xurídicu que requier la llingua asturiana: la oficialidá”.