Xuristes pol Asturianu defende’l drechu del independentista Fer a espresase n’asturianu nos tribunales

L’Aconceyamientu de Xuristes pol Asturianu vien de posicionase énte la negativa de la xueza Ángela Murillo pa que l’acusáu Fernando G.R. pudiere declarar na Audiencia Nacional española esti llunes.

Dende AXA comenten que nun son “pa dar cola pallabra afayadiza (y non faltosa) pa calificar la discriminación llingüística y l’actitú de la xueza”. Y ye que según espliquen dende’l colectivu l’Audiencia Nacional ha “garantice dafechu’l drechu a la defensa del acusáu asturianu”, pues según esponen , el14 d’abril de 2008 nel que’l Plenu de l’Audiencia Nacional anulóse’l xuiciu siguíu énte’l Xulgáu Central de lo Penal (con sede en Madrid) escontra dos mozos catalanes condergaos a 15 meses de prisión por un delitu d’inxuries a la Corona por emburiar una semeya de los reis. L’anulación tien l’orixe en torgar a los acusaos l’emplegu del catalán, lo que’l Plenu calificó como infracción a la tutela xurídica efeutiva y al procesu debíu porque, talu que proclama na sentencia, “ye una garantía del drechu a la defensa permitir al acusáu que s’esprese na so llingua materna”.

Pa Xuristes esta negación entra en contradicción cola sentencia citada. Pa ellos, “los fechos falen solos”. Piden, poro, al “gobiernu y parllamentu español qu’entame, d’una vez, a cumplir los compromisos que pa cola llingua asturiana alquirió nel añu 2001 cola robla de la Carta Europea de les Llingües Rexonales o Minoritaries y, al empar, colos mandaos al respeutu del Comité de Ministros d’Asuntos Esteriores del Conseyu d’Europa, camín amañosu pa cortar pela freba con esta castra de neciures”.