Xubida sele del númberu d’escolinos d’asturianu nel enseñu

Sele que sele, y pesie a la falta d’un sofitu decidíu y en dalgunes ocasiones a les torgues impuestes dende les instituciones, l’enseñu del asturianu avanza nel enseñu obligatoriu. La matriculación llegó esti añu hasta’l 26’31% d’alumnos matriculaos, frente al 25’7% del añu anterior, 155 alumnos más que’l cursu pasáu, lo que suma un total de 21.889 alumnos nes clases d’asturianu.

Nel enseñu primariu esti porcentaxe ye del 40,73%, con un total de 18.234) escolinos. En secundaria y bachiller esti porcentaxe baxa hasta cifres testimoniales, y namás un 9’5% de los alumnos estudien asturianu, un total de 3.655.

La concertada sigue siendo un puntu feble del sistema d’escolarización del asturianu, y les cifres non solo nun medren sinón que baxen nesta ocasión. Namás un 5’02% de los alumnos de los centros concertaos tán matriculaos n’asturianu, un total de 1.099 , frente al 5’5% del añu pasáu, cuando cursaben asturianu 1.214 alumnos nestos centros.

Amás, siguen les denuncies pola falta d’ufierta de l’asignatura y pol estatus de los profesores d’asturianu, qu’entá nun vieron solucionaes les sos reivindicaciones. Amás l’usu del asturianu como llingua vehicular nun paez que tea ente los planes de la Conseyería de Cultura, que por embargu si tien centros yá onde se dan delles asignatures n’inglés.