El grupu autoxestionáu de techno-folk Xera acaba d’asoleyar el so primer discu tituláu “Lliendes”. Esti trabayu amiesta los sones tradicionales de la música asturiana coles bases de sintentizadores, esti amiestu confier-y a Xera un sonidu inconfundible al tiempu qu’ufre nueves siendes d’esploración sonora.
Xera ye un grupu que dende que’n 2005 presentara la so primer maqueta, titulada Xera, na rede; siempre apostara pol usu de les nueves tecnoloxíes y n’especial n’aquelles que tienen por finxu compartir les produciones. Asina los temes d’esti nuevu discu pueden descargase dende’l web Xera en formatu mp3 o nel formatu llibre de compresión musical ogg, esto ye posible porque los componentes de Xera decidieron poner una llicencia Creative Commons. Asina mesmo’l discu Lliendes ta disponible en bien de sitios del país.