Gerardo Antuña,conceyal de Parques y Xardinos y Contratación, presentó en rueda de prensa una nueva edición de les visites a parques históricos d’Uviéu. Les visites entamaron esti domingu 15 de mayu y van repetise tolos xueves y tolos domingos hasta ochobre.
El conceyal, que tuvo acompañáu del coordinador d’esti programa, el doctor n’Arqueoloxía, Alfonso Fanjul Pedraza, recordó que “mientres los años 2020 y 2021 realizar de forma temporal y pionera estes visites a La Zoreda y al patrimoniu históricu-militar del Naranco. Pese al gran ésitu (con más de 700 paticipantes) y anque la intención yera estender les visites dellos meses, la idea atayase poles socesives folaes de Covid”. Agora tornen con más allugamientos y más feches. Asina, sorrayó’l conceyal Antuña, “a partir d’esti domingu, 15 de mayu, y hasta el mes d’ochobre queden abiertes les visites empuestes tolos xueves y tolos domingos (sacantes agües fuertes y por seguridá) a los parques de La Rodriga, una visita netamente urbana, (entamu a les 10 hores pola entrada inferior); La Zoreda (a les 12 hores, nel parking esterior de mercancíes del restorán Castillo de La Zoreda) y al patrimoniu históricu militar del Naranco (a les 17 hores, nes escaleres del monumentu al Sagráu Corazón)”.
Como novedá, apuntó l’arqueólogu y coordinador de les visites, “inclúyese nel programa’l parque de La Rodriga, un pequenu espaciu históricu formáu polos xardinos del antiguu palaciu del mesmu nome –yá sumíu- y el llende norte del llugar onde s’allugaba’l primer campusantu de la ciudá, d’empiezos de 1809, na denominada llomba de San Cipriano”. Y especificó que nesti allugamientu, en La Rodriga, ta llevándose a cabu una escavación arqueolóxica que va dexar documentar la posible esistencia del camín perimetral o dalgún restu del antiguu campusantu de la ciudá. Los visitantes van poder conocer la hestoria del parque y esta escavación”.
Alfonso Fanjul detalló que “les visites empuestes, nel casu de La Rodriga, van ser d’una hora; en La Zoreda d’unes dos hores porque hai más 70 elementos catalogaos nesti llugar qu’hasta apocayá yera desconocíu por munchos uvieinos y nes fortificaciones militares del Naranco, tamién de casi dos dores. Tan solo esta última ruta sorrayó Fanjul, “rique de reserva previa, por aciu whatsapp o mensaxe al númberu 679079076”.
El conceyal de Parques y Xardinos, Gerardo Antuña adelantró que “pa completar la ufierta de visites empuestes en parques históricos, y gracies a la Delegación de Defensa, tamos trabayando por que en 2023 inclúyase una visita a les instalaciones de la Fábrica d’armes de La Vega, un elementu fundamental de la hestoria d’Uviéu” y destacó “la bona voluntá de Defensa”. Tamién estimó la collaboración nel proyectu de la conceyalía de Turismu, dirixida por Alfredo García Quintana.