Vicente Gotor echa a andar la primer web n’asturianu de la Universidá d’Uviéu

Vicente Gotor presentó esta mañana nel Edificiu Hestóricu de la Universidá d’Uviéu, el nuevu portal web de la institución, que per primer vegada va poder consultase en llingua asturiana, amás d’en castellán y n’inglés. Según anuncien dende’l Rectoráu “los conteníos tán en procesu de traducción”, pero la web va estrenase nes próximes hores, yá que taba anunciao facelo pa la medianueche d’esti martes 13 d’abril.

Na primer fase del sistema va estrenase la interfaz gráfica que va dar accesu a ocho perfiles pa facilitar los sistemes de busca y les ayudes a la navegación de los usuarios (estudiantes, estudiantes nuevos, alumnáu estranxeru, antiguos estudiantes, personal investigador docente, personal alministrativu, empreses y prensa).

La web vieya va siguir activa nel dominiu uniovi.net, col envís d’evitar perdes d’información y facilitar la tresmisión.

El El Conceyu Universitariu pol Asturianu (CUPA), organización que trabaya pol asturianu na Universidá, quixo felicitar pola puesta en marcha de la nueva web de la Universidá d’Uviéu con una versión en llingua asturiana. Pal CUPA esta acción supón “el cumplimientu d’unu de los puntos más importantes de los alcuerdos ente l’equipu rectoral y el CUPA”, que sofitó la candidatura de Gotor nel so día.

Sicasí, esta organización, que “reconoz al cambiu xeneráu pol Rector alredor del asturianu na Universidá”, camienta que “tien qu’acelerase’l procesu de normalización con nueves midíes que sirvan pa normalizar l’asturianu na Institución”.

Accesu directu a la web n’asturianu