El Conseyeru de Xusticia, Seguridá Pública y Rellaciones Esteriores, Francisco Javier García Valledor, y el director de l’Axencia Asturiana de Cooperación al Desarrollu, Rafael Palacios, asisten güei en L’Habana a los actos organizaos con motivu de la cellebración del festival ‘La Huella de España’, dedicáu nesta edición al Principáu d’Asturies, ente los que figuren güei varios actos lliterarios.
Valledor y Palacios asisten, a les 11 (hora local) a un recital del coru La Flor nel Asilo Santovenia; a les 15.00 hores van escuchar la conferencia ‘Asturianos en Cuba en el siglo XX’, que pronunciará nel institutu de Lliteratura y Llingüística Jose Portuondo l’eruditu local Jorge Domingo Cuadriello; y van asistir, a les 20.30 hores na sala García Lorca del Teatru de L’Habana, a la representación d’ ‘El viaje a ninguna parte’, que va facer el grupu de teatru Margen.
Pa mantener contactu colos asturianos residentes ellí, el conseyeru de Rellaciones Esteriores allargó la so estancia na islla caribeña, a la que llegó la selmana pasada como integrante d’una delegación del Principáu encabezada pola conseyera de Cultura, Comunicación Social y Turismu, Ana Rosa Migoya –con delegación espresa del presidente, Vicente Álvarez Areces–, dalgunos de cuyos miembros tán yá en Mexico.
De la expedición orixinal formaron parte tamiien la conseyera de Vivienda y Bienestar Social, Laura González, y el conseyeru d’Industria y Empleu, Graciano Torre, mesmo que’l director xeneral de Promoción Cultural y Política Llingüística, Carlos Madera; el presidente del Conseyu de Comunidaes Asturianes, Manuel Fernández de la Cera, y varios representantes del Parllamentu Autonómicu, encabezaos pola presidenta de la cámara, María Jesús Álvarez.
El pasáu sábadu presentóse’l númberu especial ‘La Habana: de lo vivo a lo pintado’ de la revista ‘Ábaco’; el CD multimedia ‘Habaneros famosos de ayer y de hoy” y el llibru ‘Dos orillas del mismo mar’, que recueye una antoloxía de relatos d’autores asturianos y cubanos. El multimedia fízolu en cooperación col Ministeriu de Cultura de Cuba. Va tener llugar nel Centru Cultural Institutu Cubanu del Arte y la Industria Cinematográficos (ICAIC).