Valledor denuncia la destrucción d’un relieve únicu de mediaos del sielgu XVI y propón midíes de protección del patrimoniu

El voceru d’IX-BA-LV, Francisco Javier García Valledor denuncia la destrucción d’una talla única de mediaos del sieglu XVI realizada nun horru de la llocalidá de Llorío, en Llaviana. Un fechu que pa Valledor “non sólo supón la perda irreparable d’una xoya del nuestru patrimoniu cultural, sinón que demuestra l’abandonu, la neglixencia y en definitiva la fonda inorancia y despreciu de los responsables que vinieron xestionando la política cultural na nuesa Comunidá”.

Ye esta, pa Valledor, una política cultural de “pompa y circunstancia”, de “grandes eventos”, d’una “supuesta modernidá que desprecia los nuesos raigaños culturales más fondos”.

El relieve agora destruyíu, foi estudiáu por Chema Vega Blanco y Alberto Álvarez Peña, y representaba una escena ideográfica de fertilidá na qu’una muyer embarazada copulaba a la vez con dos homes .Un grabáu únicu d’una escena de corte naturalista qu’emparenta cola tradición iconográfica asturiana sobre la fertilidá que llega hasta l’arte parietal paleolíticu.

Siendo esti fechu gravísimu, ye tovía más, diz Valledor, que se produza porque “dende los responsables políticos culturales nun quixo tresmitir a la nuesa sociedá’l valir y significáu de la nuesa cultura tradicional nes sos diverses y riques vertientes: vivimos nuna Asturies na que desgraciadamente nun sabemos valorar la importancia, l’enorme valir, que pa cualesquier sociedá mínimamente culta y civilizada representa’l so patrimoniu artísticu y la so cultura tradicional”.

García Valledor, emplaza a la nueva Conseyera de Cultura a “cambiar radicalmente la orientación d’unes polítiques que llevaron a la destrucción d’una gran parte del nuesu Patrimoniu cultural”.

Énte esti fechu Valledor esixe l’aprobación de delles midíes que va presentar: “Plan Integral de Patrimoniu, Reglamentu de desenrrollu de la Llei de Patrimoniu Cultural d’Asturies y la inclusión del patrimoniu de la cultura tradicional asturiana (etnográficu) nel Inventariu Cultural d’Asturies.”

Pa Valledor nun ye posible “siguir manteniendo una política na que s’invierten miles de millones de les antigües pesetes en grandes infraestructures culturales de duldosa eficiencia y nun se protexe y pon en valor la cultura tradicional asturiana”. El diputáu camienta que nun hai nada “más moderno y actual pa cualesquier sociedá culta y civilizada que cuirar y valorar el so Patrimoniu, que nun ye namás de so sinón de tola humanidá”.