El conseyeru de Xusticia y Esteriores del Principáu, Francisco Javier García Valledor, afirma qu’un nuevu estatutu p’Asturies que nun contemplare la cooficialidá “amás d’inaceptable sería absurdu”. El representante d’IX-BA nel gobiernu autonómicu opina que na FSA hai cabezaleros que “por mieu o ignorancia tán empleando tol so esfuerzu en facer que descarrile’l tren” de la reforma estatutaria.
Valledor reclama nel nuevu estatutu amás de la oficialidá pal asturianu y el gallegu asturianu otres cuestiones como la circunscripción electoral única o la potestá pa que la Xunta Xeneral pueda autodisolvese y el gobiernu del Principáu pueda convocar comicios autonómicos.
Nun artículu d’opinión que publica’l diariu El Comercio na so edición d’esti miércoles 25 el conseyeru d’IX-BA nes sos crítiques a la posición de la FSA espresada nes últimes selmanes pol so secretariu xeneral Javier Fernández afirma que nes files de la organización federal cola so postura “pueden acabar consiguiendo qu’Asturies y la so xente, como vieno pasando hasta agora, siga nun pintando nada nel contestu estatal y estea a remolque de lo que los demás decidan perpetuando una situación de debilidá estructural”.