L’Alcalde d’Uviéu, Wenceslao López, abrió esti llunes pela mañana l’actu de presentación de les actividaes entamaes con motivu del Día Mundial del Refuxáu, una xornada “pa recordar, actuar y visibilizar les acciones de sofitu humanitariu a lo que ye la crisis d’esti sieglu”. López sorrayó la necesidá de “ayudar a estes persones que tienen qu’abelugase por cuenta de les inxusticies en diversos llugares del mundu”.
Nesta llínea, la conceyala de l’Atención a les Persones, Marisa Ponga, anunció la intención del equipu de gobiernu d’incorporar a Uviéu a la Rede Española de Conceyos d’Acoyida de Refuxaos creada pola Federación Española de Conceyos y Provincies (FEMP), cola que s’escuerre impulsar una intervención entamada dende les instituciones más cercanes a los ciudadanos y ciudadanes, como son los conceyos, pa l’acoyida de les persones que busquen asilu n’Europa. Asina mesmu, Uviéu va xuntar al Protocolu Municipal d’Acoyida ya Integración de Refuxaos que ta desenvolviendo la FEMP, nel que se va recoyer la esperiencia municipal na materia y les llínees d’actuación acordes coles necesidaes de la integración de los refuxaos na comunidá local.
Ente les midíes desenvueltes pol Consistoriu pa desaniciar la grave situación de crisis de los refuxaos, la conceyala nomó les ayudes d’emerxencia aprobaes no que va d’añu: 15.000 euros destinaos a UNRWA pa la población palestina refuxada en Siria, otros 15.000 euros a ACNJUR pa refuxaos en Xordania y otros 18.000 euros por que Brazos Abiertos pueda desenvolver el so trabayu na mariña griega. Pela so parte, la directora de l’Axencia Asturiana de Cooperación al Desenvolvimientu, Gimena Llamedo, indicó qu’el nuesu país “tien una responsabilidá” y denunció “la insolidaridá” d’una “Europa que nun ta al altor”. Nesta llínea incidió Javier Mahía, responsable territorial de Accem n’Asturies, quién esixó’l cumplimientu de los derechos reconocíos na Convención de Xinebra, cerrando “fronteres al mieu y a la rocea a les persones abelugaes”.
L’actu foi clausuráu por Samer Mohamed, refuxáu siriu que llegó a España en 2012. Foi l’encargáu de lleer un manifiestu nel que pidía qu’esta lacra nun caya nel olvidu cuando suma de los informativos” y recordó que “nun ye solidaridá, si non xusticia, polos compromisos adquiríos per España y l’UE”.