El presidente de la Federación Asturiana de Karate, Benjamín Cabanes y el Presidente de la Real Federación Española de Karate, Antonio Moreno Marqueño, presentaron esti xueves el XXXVIII Campeonatu Internacional Princesa d’Asturies, que se va celebrar el sábadu 17 d’ochobre nel Palaciu de los Deportes d’Uviéu.
Nesti troféu van competir más de 100 karateques procedentes de les Federaciones de Madrid, Andalucía, Cantabria y País Vascu, amás de deportistes de la selección española y de la Federación portuguesa. Cabanes sorrayó qu’el del sábadu ye un acontecimientu bien importante pal karate asturianu y nacional porque nel mesmu van participar dalgunes de les figures más importantes d’esti deporte n’España.
El presidente de la Federación española, pela so parte, indicó qu’ésti campeonatu ye unu de los decanos d’esti deporte n’España y confió en qu’el karate sía deporte olímpici nes Olimpiaes de Tokio 2020. Nesti sentíu, aseguró qu’el karate “va ser olímpicu sí o sí”, a falta de l’aprobación definitiva per parte del Comité Olímpicu Internacional (COI) el próximu branu en Ríu de Janeiro.
El director d’arbitraxe de la Federación asturiana amestó qu’esti campeonatu va cuntar con árbitros de gran nivel “oldeándose col nivel de los competidores”. Nesti sentíu, esplicó que va haber 6 árbitros nacionales, dos mundiales y 1 internacional, amás de los que pertenecen a la Federación asturiana.