La organización de les Naciones Uníes d’ayuda a la infancia impúnxose esta mañana a otres seis candidatures finalistes al Premiu Príncipe d’Asturies de la Concordia 2006, ente les que ruxía con fuerza la candidatura conxunta del actor Paul Newman xunto a Aaron E. Hotchner, poles sos actividaes filantrópiques, asina como la de los Bomberos de Nueva York. Con esti premiu, el xuráu del premiu a la Concordia reconoz ‘l’esfuerzu xenerosu de más de sesenta años en favor de los neños y mui especialmente, la so llucha más recien, nel continente africanu, contra la inorancia, la probitú y la enfermedá’.
El Premiu de la Concordia dáse-yos “a aquella persona o persones o institución cuyu llabor ayudare de forma exemplar y relevante al entendimientu y a la convivencia en paz ente los homes, a la llucha contra la inxusticia o qu’abriere nuevos horizontes al conocimientu o se destacare, tamien de manera estraordinaria, na conservación y protección del patrimoniu de la humanidá”.
Na pasada edición de los Premios Príncipe d’Asturies el Premiu a la Concordia foi pa les Fíes de la Caridá de San Vicente de Paúl.