UNA llama mentirosa a Consuelo Vega

Les declaraciones feches esti día por de Consuelo Vega sobre la oficialidá, comparando al asturianu col inglés y l’Euskera foron consideraes como una “broma macabra” por Unidá Nacionalista (UNA) que llama mentirosa a la Direutora de Política Llingüística nuna dura nota de prensa.

Pa UNA “la posición de Consuelo Vega fai patente la belixerancia del PSOE contra la meyora xurídica del asturianu y asitia a IU-BA énte l’espeyu de la so incoherencia ya incapacidad al facer por ser gobiernu y oposición”.

Una atalanta que “otra vegada una responsable del gobiernu asturianu, nesti casu la encargada de xestionar la Dirección Xeneral de Política Llingüística, el gran “llogru” d’IU-BA na negocación en materia llingüística, vuelve a truñar contra la oficialidá de la llingua asturiana. Unidá Nacionalista Asturiana (UNA) camienta que’l fechu de que la responsable directa de la política llingüística diga que nun ye importante pa la supervivencia del asturianu ye un fechu pergrave, porque ta mintiendo y ta contribuyendo, dende’l so cargu, a esparder una de les mentires que’l PSOE lleva intentando inxertar na sociedá asturiana; que la oficialidá ye mala o nun ye necesaria pa promocionar de forma afayadiza la llingua asturiana y asegura-y el futuru”.

Pa finar UNA quier facer alcordanza de “que lo más de la sociedá asturiano espresó en delles encuestes una posición favorable a la oficialidá, y que cuando se fai comparanza del asturianu col inglés o col euskera fálase de llingües que, nel primer casu nun oficiales porque nun existe na lexislación esa figura xurídica como tal, o nel segundu, que gocien d’oficialidá y amás d’un ambiciosu programa de normalización”

.

En definitiva, UNA “remembra que la oficialidá nun asegura la supervivencia del idioma, pero ye imprescindible p’algamala, como tol mundu persabe, polo que considerando la situación dramática del asturianu, les declaraciones de Consuelo Vega, propies d’una humorista que nun tien maldita la gracia, namás pueden vese como una broma macabra”.