Una esposición recupera parte de les ilustraciones que’l dibuxante francés Albert Uderzo fexo del so héroe Asterix fuera de los álbumes que recueyen les aventures del popular personaxe de cómic. L’amuesa de los ‘dibuxos secretos’ del míticu guerreru galu puede contemplase hasta’l prósimu 6 de febreru na sala d’esposiciones del Forum de Fnac en Siero.
Uderzo y el so compañeru René Goscinny firmaron dende 1959 un total de 32 álbumes de les aventures d’Asterix, una obra que supunxo la fechura de más de mil cuatrocientes planches. Tres la muerte va ya ventiocho años de Goscinny, Albert Uderzo siguió componiendo nueves traces al personaxe creau por entrambos autores. Agora el Forum de Fnac amuesa una parte significativa de la obra fecha por Uderzo al marxe de los álbumes.