Un norteamericanu de 10 años cocina fabada n’asturianu en YouTube

Chef Rafi, un blogueru de los Estaos Xuníos con namái diez años y unu de los cocineros más xóvenes del mundu na rede, estrenose desplicando n’asturianu la receta de la fabada.

Una de les peculiaridaes de la so canal ye que fai recetes del mundu enteru y pide collaboración de falantes y organizaciones en caún de los llugares del mundu pa doblar y sotitular el videu de la receta na llingua orixinal de la cultura onde se fai esi platu.

Agora vieno acabante asoleyar na rede un videu nel que prepara la más conocida de les recetes asturianes, la fabada, y failo en llingua asturiana, gracies a qu’Iniciativa pol Asturianu collaboró con esi youtuber cola torna y doblaxe del videu. Agora, cualaquier internatuta pue ver a esti neñu norteamericanu cocinando fabada asturiana y falando n’inglés y n’asturianu, con paisaxes de cuatro estaos del país de fondu.

Chef Rafi tien recetes en decenes de llingües del mundu enteru, ente les que tán la llingua materna de la so güela, que ye de Filipines, el waray waray. Esta foi la primer esperiencia, dempués vinieron otres munches llingües minorizaes del país, y darréu otres llingües del mundu enteru como’l navayu, luxemburgués, napolitanu, portugués, hawaianu, irlandés, chechu, catalán, vascu, galés, croata, etc. Aprovecha los viaxes cola so familia pa grabar imáxenes perdayuri, que dempués usa pal so programa en Youtube.

El videu n’asturianu pue vese nesti enllaz: https://www.youtube.com/watch?v=8_T_O_249JA