La conceyalía d’Urbanismu y Mediu Ambiente vieno acabante de contratar una empresa especializada en trabayos aéreos pa que, por aciu un dron, el Conceyu d’Uviéu disponga de fotografíes ya imaxes aérees de la entrada a Uviéu pela autopista “Y”: El Bulevar de Santuyano de los Praos.
Esti xueves, el conceyal Fernández del Pandorial y l’arquiteutu municipal, José Antonio Ramos, acompañaron a dos de los responsables de la empresa contratada, quien emplegaron un “dron multirotor, a un máximu de 50 metros d’altor, que sobrevoló una área d’unos 700 metros en llínea recta, aprosimao dende la ilesia de Santullano hasta la rotonda de la Cruz Roja”.
Col material captáu poles cámares de les que dispon el dron, esplicó’l conceyal d’Urbanismu y Mediu Ambiente, “va trabayase nos talleres participativos, previstos pal próximu mes de setiembre, y nos que se van establecer les necesidaes y los criterios d’intervención nel bulevar como pasu previu a un concursu internacional d’idees nel qu’un xuráu espertu y una consulta popular va tresformar de forma definitiva esta entrada a Uviéu”.