Un diariu n’asturianu podría tar funcionando a partir de marzu de 2009

Asturnews avanzó va un mes l’aconceyamientu d’un grupu d’inversores cola fin d’avanzar nel proyectu de creación d’un periódicu diariu n’asturianu en papel. Un mes más tarde, L’órganu d’información del Círculu Lliberal, “L’Asturies Lliberal” anunció ayeri que nel aconceyamientu del grupu de promotores fechu nel Hotel Palacio de Figareo, en Mieres, “yá se punxeron les bases pal proyeutu editorial que quier afitar un diariu impresu, íntegramente editáu na nuestra llingua, en xunto a otres estayes empresariales relatives al mundu audiovisual ya informáticu que tamién formaríen parte de la iniciativa”.

Según l’Asturies Lliberal, nel proyeutu editorial afáyense nesti momentu cinco empresarios asturianos “d’estremaes rames económiques”, amás d’un piñu persones provenientes del mundu de los medios de comunicación, de la xestión del protocolu, de la cultura asturiana y representantes de la industria editorial d’ámbitu estatal.

Esti grupu tendría, según los lliberales, una fecha fixada pa la salida al mercáu d’esti proyectu periodísticu: el 21 de marzu de 2009.

El proyectu quier ser, comente dende l’Asturies Lliberal, “una ufierta d’Opinión abierta a toles sensibilidaes del asturianismu”. Nesi capítulu destaca la propuesta de venceyar a la xente de los blogues n’asturianu col proyeutu editorial.

Un grupu de promotores estudia la creación d’un periódicu diariu n’asturianu