Últimos díes pa matriculase nos VI Cursos d’Asturianu en Xixón

Iniciativa pol Asturianu tien abiertu’l plazu hasta’l domingu 25 p’apuntase a los VI Cursos d’Asturianun en Xixón, entamaos en collaboración col Conceyu Universitariu pol Asturianu (CUPA), l’Academia de la Llingua Asturiana y el Conseyu de Mocedá de Xixón. Los cursos que se van facer una edición más na sede del Conseyu de la Mocedá de Xixón (Avda. Manuel Llaneza, 68), van entamar a partir del 26 de xineru, cuntando con 36 hores llectives cada nivel. Alumnos de Bélxica, Barcelona o Arxentina tán yá apuntaos a estos cursos al traviés d’internet.

El cursu va celebrase los llunes y miércoles, de 17 a 19 hores nel casu del nivel inicial, y de 19 a 21 hores pal nivel II, acabando’l 25 de marzu de 2015.

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.

El nivel II ta empobináu a persones con una conocencia más fonda del idioma, que yá ficieren dalgún cursu enantes. El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les persones que nun puedan asistir por tar fuera d’Asturies o por razones d’otru tipu van poder siguir el cursu a distancia.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, yá seya llamando o al traviés de Whatsapp o Telegram, hasta’l 25 de xineru de 2015.

Dende Iniciativa pol Asturianu animen una edición más a participar nesti cursu que va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.

Novedaes nos cursos a distancia

Nesta sesta edición de los cursos abrimos una plataforma d’enseñu na rede, empobinada a los alumnos y alumnes que siguen los cursos en llinia. Un preséu que va permitir ameyorar abondo los procesos de deprendizaxe, adaptándolos meyor a les nueves tecnoloxíes.