L’Academia de la Llingua Asturiana va zarrar mañana, xueves 24, el plazu pa matrículase na primer prueba de conocencia d’esti añu, que se celebrará’l próximu sábadu 26 de xineru. La segunda oportunidá p’algamar el diploma de conocimientu básicu del asturianu a nivel 1 va facese en mayu.
La prueba va tener dos partes, una escrita (dictáu, torna, exercicios gramaticales, redaición) y otra falada (conversación) na que se van valorar los conocimientos gramaticales, d’espresión escrita y oral asina como la conocencia del allugamientu de la llingua dientro de la sociedá asturiana y del procesu de normalización en que ta inxerta.
Na web de l’ALLA hai más información sobre la prueba y sobre la bibliografía necesaria pa preparar esti esamen, ente ella la Gramática de la Llingua Asturiana y les Normes ortográfiques espublizaes pola institución.