La plaza de Trascorrales va acoyer esti miércoles 25, la conmemoración del Día d’África, qu’anguaño ta dedicáu a ‘Los Derechos de les Muyeres y l’Igualdá’, con una numberosa ufierta d’actividaes qu’entamen a las 17,30 hores.
El narrador Boniface Ofogo, va ser l’encargáu, a les 17:30 y a les 19:30 hores, de tresmitir al traviés de los sos cuentos, l’espíritu d’África. ‘África, ente la lliteratura y el poder’ ye’l títulu de la charra que va ufiertar Xustu Boleika, catedráticu del Departamentu de Filoloxía Francesa de la Universidá de Salamanca, y cola que va averar a los asistentes a les lliteratures africanes. La cita ye a les 18:00 hores.
Amás, a les 19:00 hores, el grupu de música africana Jammu África, va impartir un taller de percusión y otru de danza, a les 20:30 hores. A lo último, la programación inclúi cinco exposición: ‘Muévite per África’, d’Ayuda n’Acción; ‘Crisis nel Sahel’, de Cruz Roja; ‘Musó, ser muyer en Malí’, de DASS; ‘Miraes Escaecíes’, de Matumaini, y ‘¿Qué foi de los ODM?’, de Mélicos Mundi.