Con una selmana de diferencia, esti miércoles hebo’l segundu estrenu absolutu consecutivu de fechu n’Asturies en escenAvilés. La compañía Factoría Norte presentó n’esclusiva la so última propuesta, “The Asturian Sisters”, una aceda comedia que conxuga’l musical, el cabaré y el vodevil. Foi esti miércoles 27 d’abril, nel Teatru Palacio Valdés, a les 20.15 hores.
Eladio de Pablo robla’l testu y dirixía esti miércoles una divertidísima función, na que l’humor marca’l tonu, siempres sogón ya intelixente, con un fundamental protagonismu de la música, un ritmu azogosu, y na que los y les protagonistes viviron un continuu xuegu d’engaños y desengaños, nun mundu llenu de falses verdaes y verdaderes mentires. Nella, trés esitoses actrices del musical, cola llegada de la pandemia qu’acentuó la precariedá del oficiu, deciden fundar una comunidá, The Asturian Sisters, retirada del mundanal ruiu, basada nel esfrute del intre pasaxeru, les bones vibraciones y la paz del espíritu. Pero too empezó a complicase cuando unu de los integrantes empieza a creese Clarín redivivo, pero escaecíu pola sociedá.
Pa remediar la so murnia, les trés actrices, interpretaes por Sheila Montes, Ana Morán y Paula Mata, punxeron en marcha un espectáculu musical como homenaxe al xeniu, y compañeru de comuña. Pero los homenaxes cargar el diañu… Completaben el repartiu Chus Serrano y Hugo Mansu.