Cine

El realizador Carlos Navarro presenta esti miércoles 8 nel nuevu Teatru Filarmónica d’Uviéu la so última película de ficción: “Último tren a Tahití”, un cortometraxe protagonizáu polos actores Mariola y Guillermo Valleverdú y que cuenta cola banda sonora del compositor Ramón Prada, interpretada pola Orquesta Sinfónica Ciudad de Oviedo(OSCO). L’autor de filmes como “La neña los mios güeyos”(1999)y “El espejo”(2001)narra na obra que mañana s’estrena n’Uviéu una hestoria d’amores y desalcuentros onde la señaldá ye dalgo más que’l posu mafientu del tiempu.

“Último tren a Tahití” ye una producción de Médula y Blaster Televisión, dirixida y escrita por Carlos Navarro, na que la dirección de fotografía cuerre a cargu de Geno Cuesta. Los actores protagonistes, Mariola Ruíz (Clara) y Guillermo Vallverdú (Víctor), tienen una llarga carrera artística a les sos cuestes. A lo llargo de la so carrera como intérprete cinematográfica Ruíz trabayó con directores como Carlos Saura (El séptimo día), Vicente Aranda (Carmen)o Manuel Martín Cuenca (La flaqueza del bolchevique)y acaba de rematar va unos díes el rodaxe de la última película de la catalana Silvia Munt. Vallverdú, pela so parte, ye un artista con llarga trayectoria dende los sos inicios como actor de teatru de cai hasta los sos más recientes trabayos en televisión, onde interviniera en series como “Al filo de la ley”(TVE), “Hospital Central”. “El Comisario” o “Javier ya no vive solo”(Tele 5); anguaño trabaya como animador na popular serie “Siete vidas”(Tele 5). Nel cortometraxe de Carlos Navarro intervienen tamién los actores asturianos Fran Sariego (mozu), Marga Llano (moza), Mariano Colunga (home del traxe)y Lena Bárcena (Claudia). Na parte técnica descata’l trabayu de montaxe a cargu de los tamién asturianos José Braña y de Sergio S. Sánchez como ayudante de dirección. El cangués Ramón Prada escribió la música de la película y dirixe a la OSCO na so interpretación de la banda sonora.

El director de “Último tren a Tahití” ye un de los realizadores más premiaos y de más intensa carrera d’Asturies con títulos a les sos espaldes como los ya mencionaos “La neña los mios güeyos” o “El espejo”, pero tamién “Truchas”(1996), “Entre líneas”(1997), asina como de la videocreación pa la ópera “Elektra”(2004). Anguaño trabaya na preproducción del llargometraxe documental “Sola en mitad de la tierra”, un trabayu de recuperación de la memoria hestórica asturiana.

“Último tren a Tahití”(2004) estrénase esti miércoles 8 a les 20,30 nel nuevu Teatru Filarmónica nuna proyección que va cuntar cola presencia del director y de los sos actores y actrices protagonistes.

El serviciu de prensa de la Fundación Príncipe d’Asturies anunció que’l realizador y actor Woody Allen quier entamar n’Uviéu un proyectu empobináu a la difusión del cine d’autor énte la sobremacía de la producción comercial. L’autor de “Manhattan” va tar na ciudá carbayona esti sábadu 14 convidáu pola Fundación dientro los actos de conmemoranza del so venticincu aniversariu. Allen caltendrá el so segundu alcuentru col públicu asturianu, después del celebráu en Xixón va dos años, nun actu programáu pa les 19.00 hores nel Auditoriu d’Uviéu.

El realizador niuyorquín fiel a la so palabra dada d’entamar dalgún proyectu relacionáu cola cinematografía nel nuestru país, acabante recibir el Premiu de les Artes de la Fundación Príncipe d’Asturies, quier desenvolver n’Uviéu un proyectu de difusión del cine d’autor asemeyáu al que ya esiste en Nueva York puxáu por Allen y otros realizadores como Martin Scorsesse y Steven Spielberg.

Fontes de la Fundación anunciaron que la sé del proyectu del cineasta americanu había tar nel futuru muséu de la institución, inda ensin ubicación fixa y que provisionalmente podía agospiar el Palaciu Villa Magdalena, nel centru d’Uviéu. Esta iniciativa, afalada pola FPA tien como principal oxetivu favorecer l’amuesa de películes de calidá a les que el públicu nun puede acceder poles canales comerciales ordinaries. Con esti proyectu, Woody Allen quier qu’Asturies se convierta nun referente mundial del cine d’autor.

Los oxetivos d’esti proyectu, apoyáu y respaldáu por Woody Allen, son amás de facilitar la proyección de películes non comerciales, contribuir a la preservación de la cultura gracies a l’amuesa de producciones cinematográfiques, como parte del patrimoniu cultural mundial, la proyección de cintes respetando el montaxe del director; promocionar la investigación na industria cinematográfica; promover la creación de compañíes relacionaes col cine, contribuir a la preservación de películes antigues y apoyar el trabayu de los nuevos talentos.

Respective al alcuentru públicu que Woody Allen va celebrar esti sábadu 14 a les 19.00 hores nel Auditoriu d’Uviéu, la Fundación Príncipe d’Asturies ta repartiendo al través d’una taquiella del coliséu uvieín mil quinientes invitaciones de baldre p’asistir al actu.

Más información

La miniserie de televisión “Cinco poemes” ta emitiéndose diariamente na desconexón territorial de la 2 de TVE, en Tele Asturias y en delles emisores locales. Esti pasáu viernes 29 poryectábase per primer vez el DVD que contién los cinco cortometraxes nun actu celebráu nel Aula de les Metáfores de Grao y agora van ser los espectadores de toa Asturies los que puedan ver el resultáu d’esti proyectu de colaboración ente cinco realizadores audiovisuales asturianos y otros tantos poetes na nuestra llingua. El DVD va distribuíse a lo llargo de la Selmana les Lletres y darréu unviaráse a biblioteques públiques y centros educativos.

El públicu asistente a la proyección de “Cinco poemes” nel Aula de les Metáfores de Grao pudo ver en primicia’l resultáu d’un trabayu colectivu que tenta amosar l’interés y la calidá que tien l’actual lliteratura en llingua asturiana y tamién el llabor creativu de realizadores mozos enfotaos en crear una propuesta de nuevu cine asturianu. Cada obra ye bien distinta y el métodu siguíu per caún de los realizadores a la hora de plantear el so trabayu tamién lo foi. Sergio Sánchez recrea el poema “La muerte” de Roberto González-Quevedo cola filmación d’un relatu desplegáu n’ilustraciones asemeyaes a les de los llibros infantiles y con él tenta cuntase la perplexidá desosegante cola que s’enfrenta a la realidá de la muerte un nenu. José Braña afronta la llectura de “Una casa” de Berta Piñán al través d’un formatu asemeyáu al del llinguaxe publicitariu audiovisual, utilizando animaciones, sobrescritures, etc. con un resultáu de gran espectacularidá. Jorge Rivero reconstrúi visualmente los versos de “Ente nós” d’Ana Vanessa Gutiérrez treslladando la intimidá del alcuentru narráu nel poema a los espacios lluminosos de la playa de San Xuan de Nieva. Juan Luis Ruíz y Lucía Herrera filmen “El Balagar” de Pablo Antón Marín Estrada con una interpretación radical del poema nel que la propia voz del so autor lu materializa sobre imáxenes rodaes en Super 8. Per último Ramón Lluis Bande, fai un arriesgáu exerciciu de realismu documental poniendo los versos de “Paniceiros” de Xuan Bello na voz de dellos vecinos del llugar natal del poeta.

Nel actu de presentación de “Cinco poemes” celebráu nel Aula de les Metáfores de Grao, desenvolvióse darréu de la proyección una mesa redonda

con diversos creadores asturianos: el pintor Hugo O’Donnell, les escritores Taresa Lorences y Ana Vanessa Gutiérrez, y el músicu Xabel Vegas, na que se reflexonó sobre les posibilidaes creatives qu’ufierten les colaboraciones ente artistes y sobre’l papelu d’éstos nel desenvolvimientu d’una producción cultural enfotada na construción d’Asturies como territoriu de la realidá.

El director de la Filmoteca Asturiana, Juan Bonifacio Lorenzo Benavente, y el director xeneral de Política Llingüística y Cultura, Carlos Madera, presentaron ayer n’Uviéu el nuevu ciclu qu’entama la institución cola segunda guerra mundial como telón de fondu. L’amuesa escomienza con “Casas Viejas” de Basilio Martín Patino y inclúi nuna segunda parte del ciclu el documental “Francisco Boix, un fotógrafo en el infierno” sobre’l retratista español qu’arrepresó cola so cámara l’horror de los campos d’esterminiu nazis.

Les películes proyectaránse tolos martes na Biblioteca de El Fontán y na primera parte del ciclu, aparte de la hestórica cinta de Martín Patino, van poder vese “La posada de la sexta felicidad”, sobre la invasión xaponesa de China; “Amenaza de tormenta”, que narra al través de la figura de Winston Churchill los años difíciles nos que dalgunos países aliaos duldaben de les verdaderes intenciones belicistes de Hitler; y “La batalla del Río de la Plata”, sobre la persecución d’un acorazáu alemán pela armada británica peles costes d’Uruguay.

La segunda parte del ciclu inclúi títulos como “El Pianista”, “La lista de Schlinder”, “Diario de Ana Frank” y el llargometraxe documental “Francisco Boix, un fotógrafo en el infierno”, onde se rebusca la esperiencia d’esti retratista republicanu nos campos de concentración nazis. El ciclu proyectará tamién “Shoah”, el documental de llarga duración que firmó Steven Spielberg sobre l’holocaustu xudíu con testimonios reales de supervivientes.

Na presentación d’esta amuesa de la Filmoteca Asturiana, tanto’l so director, Juan Bonifacio Lorenzo, como’l director de Cultura, Carlos Madera, coincidieron na “necesidá de recordar al través de la visión que dio’l cine d’ello un tiempu que nun había volver a repetise enxamás y que les nueves xeneraciones habíen conocer pa evitar que vuelva a suceder en mundu nada paecío a esi, el primer conflictu bélicu nel que les víctimes civiles superaron con creces a los soldaos muertos nel campu batalla.

Fran Gayo, componente de Mus, desplicaba unos díes enantes de viaxar a Rusia los oríxenes de “L’escaezu”, un proyectu cinematográficu de los realizadores Llucía Herrera y Xuan Lluis Ruíz alrodiu de la memoria viva de los neños espatriaos a l’antigua Unión Soviética tres la caída d’Asturies na seronda de 1937. El músicu cuntó entós que la idea surdió énte la posibilidá d’actuar pa los supervivientes d’aquella diáspora en Moscú, aprovechando la minixira del so grupu per tierres ruses. Después el proyectu foi medrando y atopando la forma d’un llargometraxe documental nel que’l conciertu de Mus colos ‘neños’ algamaba ún de los cumes emocionantes de la película en marcha.El sofitu económicu de l’Axencia Asturiana de Cooperación pa sufragar los gastos del viaxe dio-yos l’emburrión definitivu. Agora, a la vuelta de Moscú, los músicos de Mus y los autores del documental afirmen sentir “un compromisu moral irrefugable” por rematar el proyectu y barrunten la posibilidá de volver a Rusia pa completalu.

Llucía Herrera, coodirectora de “L’escaezu” y espectadora privilexada del conciertu nel Centru Español de Moscú, recuerda como ún de los momentos más entrañables del alcuentru la pitición espontánea de dellos ‘neños de Rusia’ al oyer l’últimu cantar de Mus pa que’l grupu roblare la so actuación col “Asturies patria querida” y la respuesta inmediata de los músicos d’esta banda de cultu del pop-folk independiente arrincando los sones del himnu nacional asturianu. La fidelidá a los sos oríxenes ye una constante qu’estos homes y muyeres espatriaos del so país siendo alpenes unos rapacinos caltuvieron a lo llargo de los años, asina Herrera alcordábase tamién del testimoniu d’una d’eses ‘neñes’ qu’amosaba arguyosa los papeles colos que “recuperara la ciudadanía asturiana” o la remembranza que munchos de los ‘neños’ cultivaben d’un país qu’alpenes conocieran a nun ser al través de la señaldá.

El documental de Llucía Herrera y Juan Lluis Ruíz

tenta devolvé-yos tamién a esos homes y muyeres la memoria que-yos negó un tiempu adversu y la llarga dictadura de los vencedores na guerra civil. Bien d’esa memoria ufiertáron-yoslo los propios protagonistes d’esti episodiu poco conocíu del esiliu republicanu colos sos testimonios orales y l’abonda documentación gráfica y material que conserven, amás del incuntable patrimoniu sentimental y vital. D’esos elementos aportaos polos propios ‘neños’ y de la mirada comprometía de la so cámara va iguase la narración documental del llargometraxe, un proyectu que los sos autores camienten “inda llargu y llaboriosu de rematar”.

Tres les vivencies esperimentaes na escasa selmana na que tuvieron rodando en Moscú, Herrera y Ruíz, fondamente impactaos pola presencia enfotada de los ‘neños’ supervivientes, contemplen la posibilidá: “inda un deséu más qu’una posibilidá que tengamos manera de materializar”, de volver a Rusia pa completar el documental.

El conciertu de Mus foi ún de los momentos cumes de les decenes d’hores grabaes en Moscú y cola consumación d’esti alcuentru, que’l músicu Fran Gayo afalagaba, díes enantes n’Asturies, como “un retu d’altu riesgu” pal so grupu del que desconocíen la reacción que diben tener los espectadores del Centru Español énte los sones d’una banda avezada a actuar pa un públicu mozu y desixente énte una ufierta artística como la del grupu xixonés. Agora el círculu col qu’entamó esti viaxe a la memoria callada d’unos asturianos condergaos per munchu tiempu a ser silenciu y escaezu, cerrábase pa abrir nuevos círculos concéntricos na llinia argumental del llargometraxe nel que trabayen Llucía Herrera y Xuan Lluis Ruíz. Una vuelta moral a un pasáu tan recién qu’inda vive y sueña nunos homes y muyeres que tovía son voz presente y a los que les xeneraciones futures tienen derechu a escuchar y conocer la so hestoria.

El Certame Nacional de Cortometraxes Villa d’Avilés entamó una añu más la so andadura con un programa intensu y afastáu d’actividaes interactives col públicu asistente a les sesiones. Una amuesa de cine documental sobre cultura urbana, la presentación de películes que nun entraron en circuitu de la eshibición comercial al pesar de la so calidá, un repasu a trabayos premiaos n’anteriores ediciones y sesiones nocturnes con animadores en directu son les principales propuestes qu’espón esti festival nel que’l principal oxetivu sigue tando nel formatu cortometraxe.

Después de la inauguración ayer del festival con una proyección de cortos d’animación de diversos autores y una sesión nocturna, presentada pol cómicu televisivu Don Mauro y dedicada a enseñar en prestrenu el largometraxe “White skin”, les sesiones prosiguen esti xueves 7 a les 17,00 con un repasu a los meyores trabayos presentaos nes anteriores ediciones embaxo’l títulu “Un vistazo atrás”. A les 18,30, proyectaránse tres películes documentales alrodiu de la cultura urbana: “Aerosol” de Miguel Angel Rolland, un filme sobre la evolución del graffiti dende la so consideranza como espresión artística contemporánea; “Per-ser”, documental de los avilesinos Amar Hernández, Eduardo G.Mon y David Hernández, sobre’l mundu del “skate”; y como platu principal: “Bagdad Rap” d’Arturo Cisneros, criba hipercrítica sobre la guerra d’Irak y que va contar cola presencia del director del filme. A les 22,15 proyectaráse dientro les sesiones noctures el llargometraxe “Lost in La Mancha”.

Mañana viernes ábrense les sesiones de tarde cola primer entrega del ciclu “Los otros”, dedicáu a cortometraxes presentaos fuera de concursu. A les 19,00 hores proyéctase “The Birthday” d’Eugenio Mira y a les 21.00 “Tempus Fugit” d’Enric Folch; n’entrambes sesiones cuntaráse cola presencia de los directores d’estes obres y nel casu del filme de Folch, tamién cola participación de l’actriz protagonista Neus Asensi. La última sesión de la xornada ocúpala la III Noche de Culto presentada por Jesús Palacios.

El festival avilesín llegará a la so fin el sábadu 9 cola segunda entrega de “Los otros” y la proyección a les 19,00 de les obres finalistes del concursu na que tamién s’ufiertará el cortometraxe “El último tren a Tahití”, ganador del I Concursu de Realizadores Mozos “Ciudá d’Avilés”. Darréu celebraráse la entrega de premios y la ceremonia de pieslle del festival nuna gala animada pol cómicu de “La Hora Chanante” Raúl Cimas.

Más información

Los realizadores Xuan Lluis Ruíz y Llucía Herrera viaxen nos prósimos díes a Rusia cola intención de rodar pal so documental ‘L’escaezu’ los testimonios de Neños de la Guerra asturianos residentes n’antigua Unión Soviética dende la so evacuación en 1937. Xunta ellos viaxa’l grupu Mus nuna minixira que los va llevar a Moscú y San Petesburgo y na qu’actuarán pa los supervivientes d’esta diáspora. El conciertu ye parte del filu argumental de la película de Ruíz, un proyectu nel que los músicos de Mus van poner dalgo más que la banda sonora.

El proyectu presentóse na Conseyería de Xusticia y Esteriores nun actu que cuntó cola presencia del so titular, Francisco Javier García Valledor, y d’un grupu d’estudiantes d’Hestoria de la Universidá d’Uviéu que realicen un trabayu, nel so casu académicu, tamién sobre la memoria de los Neños de Rusia. Entrambos proyectos cuenten col apoyu económicu de la Conseyería, esmolecida, aseguró García Valledor por “recuperar una parte de la hestoriaescaecida d’esos homes y muyeres”.

Nel actu tuvieron presentes la co-directora de “L’escaezu” Llucía Herrera y Fran Gayo, componente del grupu Mus, al so llau Pablo Montes, en representación del equipu d’investigación de la Universidá d’Uviéu y Carmen García, profesora d’Hestoria Contemporánea y coordinadora académica del trabayu.

El músicu Fran Gayo desplicó los oríxenes del proyectu cinematográficu de Ruíz y Herrera y de la colaboración de Mus nél: “contratáranos p’actuar en Moscú y San Petesburgo y nun principiu pensóse na posibilidá de que nos acompañara un equipu pa grabar les actuaciones, sicasí el fechu d’entamar esos conciertos por sí solos acabó por paecenos insustancial, l’asuntú cambió cola coincidencia del documental que proyectaron facer Xuan Lluis y Llucía, y el proyectu empezó a medrar y cobrar sentíu”. Pal músicu xixonés la posibilidá d’ufiertar un conciertu especial “con un repertoriu que nun ye’l del grupu, basáu en temes populares asturianos, va ser una auténtica preba de madurez pa nós, una esperiencia que nos va marcar y si la receptividá

d’estos ‘neños de la guerra’ ye positiva, diba ser una de les mayores satisfaciones de la nuestra vida musical, nun m’importaría después sacar un discu y que nun vendiéramos nin una copia, ya tábamos bien pagaos con esi conciertu énte esos homes y muyeres”, afirmó p’añedir que “se trata d’un conciertu d’altu riesgu, probablemente el más difícil que vamos dar nunca”. Gayo refirióse al sentíu d’un proyectu como ‘L’escaezu’ na necesidá de “recobrar una parte de la hestoria y la identidá d’Asturies que-yos foi negada” a los neños evacuaos na guerra civil y que “tamién se nos quiso negar a les xeneraciones posteriores”. La realizadora Llucía Herrera afondó nesa “falta de referencies na memoria colectiva d’un tiempu y d’una xente que formen parte de la identidá oculta d’esti país” y agradeció el sofitu de la Conseyería de Xusticia y Esteriores y de l’Axencia Asturiana d’Emigración, que sufraguen los gastos del viaxe del equipu a Rusia: “ensin esi apoyu y sobretoo el moral el proyectu hubiere sío bien difícil de llevar a cabu”. Herrera tamién quiso agradecer y tener una alcordanza especial pa la presidenta de l’Asociación de Neños de Rusia d’Asturies, Araceli García, “por toles facilidaes que nos ufiertó y el so aliendu constante nel proyectu”.

El resultáu final de “L’Escaezu” va ser un documental de llarga duración filmáu ente Asturies y Rusia colos testimonios orales de ‘neños’ evacuaos a l’antigua Unión Soviética na caida del frente republicanu d’Asturies en 1937. La presencia latente o perceptible de los sones señaldosos y envolventes de Mus, xunto a la mirada iluminadora de Xuan Lluis Ruíz y Llucía Herrera, serán los testigos de les narraciones reales de los supervivientes al tráxicu tiempu hestóricu que-yos tocó vivir y sobremanera al escaezu na memoria del presente y del futuru.

Los cinco meyores cortometraxes de la edición correspondiente al añu 2003 del Festival Internacional de Cine de Xixón acaben d’apaecer publicaos nun DVD de difusión comercial. El sellu barcelonés theEND ye’l responsable de la escoyeta del certame xixonés, que se presenta dientro una colección na que s’ufierten les meyores producciones en formatu de cortu de los festivales de Sitges, Alcalá d’Henares y InCurt. Na esbilla del festival de Xixón inclúise ‘7,35 de la mañana’ de Nacho Vigalondo, nominada a la última edición de los Oscars.

Los títulos seleccionaos na entrega correspondiente a la edición 41 del certame internacional son amás del musical de Vigalondo, la producción danesa ‘Smá skred/Pequeñas avalanchas’ de Brigitte Staermose; ‘El Patio’, cortometraxe arxentín de la realizadora Milagros Mumenthaler; ‘Les mains froides/Las manos frías’, producción belga de John Shank; y ‘Viernes’ del cineasta español Xavi Puebla.

El sellu barcelonés theEND, editor d’esta serie de DVDés, quier dar a conocer al través d’ella les meyores producciones nacionales y internacionales que se proyectaron en festivales españoles nun formatu que nun siempre llega a les sales cinematográfiques o ye de fácil accesu n’edición comercial. La colección titulada ‘Metraje corto’ consta de cinco DVDdés que recueyen xunto a los cinco cortometraxes del Festival Internacional de Cine de Xixón 2003, esbilles de Animat 10 ed. del Festival de Sitges, una selección de los cinco meyores cortos fantásticos de la 36 edición d’esi mesmu festival, Alcine 33 ed. del Festival Internacional d’Alcalá d’Henares ya InCurt 4 ed. del Festival de Cortometraxes d’Europa y del Mediterráneu.

El sellu editor de ‘Metraje corto’ trabaya anguaño na publicación d’otres dos colecciones de DVDés dedicaes al xéneru documental y al video-clip respectivamente.

La segunda edición de l’amuesa ‘Rellumes’ que tenda dar a conocer el trabayu audiovisual d’autores asturianos nel esterior echa a rodar güei na Filmoteca Española de Madrid con dos sesiones a lo llargo d’esti xueves 17 y viernes 18. Programada dientro les actividaes añales del Festival Internacional de Cine de Xixón el ciclu d’esta segunda edición amuesa diez cortometraxes de realizadores asturianos rodaos nos dos últimos años. L’asociación Asturianos en Madrid (ASMA) collabora na organización de l’amuesa na Filmoteca Española.

El ciclu ‘Rellumes’intenta espeyar la realidá de la creación audiovisual n’Asturies anguaño, un panorama “ciertamente interesante, polo menos en propuestes y teniendo en cuenta les dimensiones reales del país”, afirma Fran Gayo responsable de programación del festival xixonés. Esa ye una de les razones que motivaron la programación de l’amuesa itinerante l’añu pasáu y qu’en vista del interés despertáu agora tien la so segunda edición. Pal programador del ciclu: “trátase d’utilizar los calces habituales pelos que’l Festival canaliza actividaes d’intercambiu pa difundir unos trabayos con calidá bastante como pa dar sentíu a una amuesa d’esti tipu”.

N’anterior edición de ‘Rellumes’ l’amuesa consistió nuna sola proyección na Filmoteca Española de Madrid que presentaba trabayos realizaos por autores asturianos dende 1999. Nesta ocasión el miniciclu céntrase na creación audiovisual más recién, acutando la so esbilla retrospectiva a los dos últimos años. Otra novedá resaltable ye la itinerancia de l’amuesa ‘Rellumes 2005’ que podrá vese amás de nes sesiones de güei y mañana en Madrid, nel Centro Galego d’Arte y Imaxe d’A Coruña los díes 13 y 14 de xunu y na Filmoteca de Valencia nuna fecha inda por concretar de la seronda, que podía ser nel mes d’ochobre.

Los cortometraxes que van poder vese nesti miniciclu itinerante son: “Bon voyeur” de Iraida Lombardía, “María Luisa” de Patricia García, “La casa vacía” de Paulino Ibañez, “Nenyure” de Jorge Rivero, “Amáquina” de Francisco Deborja, “Tierra de guerrilleros” d’Amanda Castro, “Entaína” d’Alberto Pardo, “A la cola” de David Goberna y Adrián Castañera, y “Temporada baja” de Sergio G. Sánchez.

Más información

Una amuesa significativa de los trabayos cinematográficos fechos por una decena de realizadores asturianos va poder vese na Filmoteca Española de Madrid. La iniciativa ye del Festival Internacional de Cine de Xixón en colaboración cola asociación Asturianos en Madrid(ASMA) y pretende esportar pa la so difusión el llabor creativu que desenvuelven nos últimos años realizadores mozos del nuevu cine asturianu.

El miniciclu que se va proyectar na Filmoteca lleva’l títulu de ‘Rellumes’ y tenta ser fiel a él: amosar unos rellumes, significativos y prestosos, del trabayu que desenvuelven nel campu del cortometraxe realizadores asturianos. La cita va ser los díes 16 y 17 de marzu y el programa que se ufierta son los cortometraxes: “Bon voyeur” de Iraida Lombardía, “María Luisa” de Patricia García, “La casa vacía” de Paulino Ibañez, “Nenyure” de Jorge Rivero, “Amáquina” de Francisco Deborja, “Tierra de guerrilleros” d’Amanda Castro, “Entaína” d’Alberto Pardo, “A la cola” de David Goberna y Adrián Castañera, y “Temporada baja” de Sergio G. Sánchez.

Ye la primer vez qu’una amuesa tan amplia de lo que se ta faciendo n’Asturies nel campu del cortometraxe se presenta en Madrid y una ocasión única pa comprebar la calidá del nuevu cine asturianu.