Suburbia edita “Contra’l Silenciu”, una esbilla de Berto García de tola poesía espublizada en llingua asturiana dende’l Surdimientu

Suburbia Ediciones asoleya Contra’l Silenciu, el númberu 13 de la so colección de poesía Males Tierres. Con esta obra, cuya esbilla y compilación débense al tamién poeta Berto García amuésase un completu panorama de tola poesía espublizada en llingua asturiana dende los tiempos del Surdimientu fasta anguaño. Nella apaecen tolos poetas en llingua asturiana xunto cola mención a toles sos obres espublizaes.

De cada ún d’ellos Berto García seleccionó un poema y en pallabres del compilador:”Esti llibru ye una cenciella pero, al empar, completa esbilla de poesía del Surdimientu, cola qu’afitar que l’asturianu tien una puerta abierta al futuru. Esta compilación quier ser una referencia, un puntu d’arrinque pa quien s’avere a la poesía en Llingua Asturiana; un escaparate onde poder ver lo meyor de la creación na poesía llariega y qu’afale l’enclín por siguir conociendo y andando’l camín de la poesía contemporánea n’asturianu. Frutu d’un llargu procesu d’afondamientu tienes, agora nes tos manes llector, una amuesa d’esta estaya de la lliteratura, na nuesa llingua, nos últimos trenta años.”