El sindicatu SUATEA amuesa tres de la comparecencia del Conseyeru d’Educación la so fonda preocupación pol anunciu de recisión de la rede de centros docentes y lo qu’atalanta ye falta de sensibilidá coles denuncies del profesoráu asturianu.
Pal sindicatu asturianu, la comparecencia nel parlamentu asturianu del Conseyeru d’Educación sirvió pa escaecer los problemas que tien el sistema educativu asturianu, “como son la precariedá y la inestabilidá de les plantiyes, con más de la cuarta parte de docentes interinos -de los que más de 1000 tán trabayabdo a media xornada-, l’avieyamientu del profesoráu, la sobrecarga de trabayu nos centros educativos, o l’incrementu de llabores nes escueles y nos institutos con cada vez menos personal pa poder facelos”.
Sobre l’aplicación de la LOMCE, amás “el Conseyeru nun plantega refugar la llei de frente nin respuende a los graves problemas que van tener los centros educativos a los que se-yos esixe aplicar una llei con fecha de caducidá. El trabayu burocráticu que lleva l’aplicación apurada d’esta llei ta afogando al profesoráu y quitando de desendolcar una atención amañosa al alumnáu. Tampoco nun fai referencia a que se vayan a refugar les reválides que trai consigo la LOMCE”.
SUATEA nun ye más optimista como organización alrodiu de les propuestes continuistes referíes al préstamu de llibros de testu, que nun miren pol establecimiento necesariu de la gratuidá de tol material escolar na rede educativa pública, como demanden les families: “Paez que s’anecia en caltener el programa sobrecargáu impuestu pola Conseyera anterior y que tantu refugu creó y crea nos centros educativos al tener que trabayar ensin una dotación curiosa de personal pa ello. Tampoco nun se plantega revisar darréu el llamáu “medicamentazu”, imposición de la anterior Conseyera y claramente refugáu polos docentes”.
El Conseyeru nun fizo referencia na so comparecencia a meyorar les condiciones llaborales del profesoráu, magar sí que mencionó los alcuerdos de plantiyes coles organizaciones sindicales, “pero estos alcuerdos nun se tán cumpliendo. Falta profesoráu d’apoyu en primaria, nun se conceden les places de profesoráu tutor especialista de primaria nin los apoyos d’infantil, nun s’entamen los desdobles necesarios n’idiomes, en llaboratorios, n’atención a la diversidá. Nun s’atiende pa les demandes de los centros y impónense places con perfil billingüe cola oposición esplícita de los equipos directivos…”
Y nun se fai tampoco referencia nenguna a la reducción horaria pal profesoráu mayor de 55 años, como apaez na llei: “Nin se diz nada, por supuestu, de la recuperación de les 18 hores llectives pal profesoráu de secundaria, FP o enseñances de réxime especial o la restitución de los horarios anteriores al “decretazu” en primaria ya infantil.
Pero sí se menciona una revisión de la rede de centros. Mieu da qu’esta propuesta pueda traer consecuencies graves pal alumnáu y el profesoráu asturianu. Nun paez que la llinia vaya a ser meyorar l’atención a la zona rural. Vese bien al ñegase a conceder bachilleratu en Zarréu, cuando una pequeña inversión en profesoráu podría dar solución a decenes de familias que tienen qu’unviar a los fíos a estudiar fuera d’Asturies”.
Lo que piden dende SUATEA ye que’l Conseyeru tuviera aconceyao primero colos sindicatos representantes del profesoráu, enantes de la comparecencia, “como-y pidiéramos reiteradamente, polo menos dende SUATEA, que llamenta fondamente nun poder tresmiti-y en persona estes esmoliciones”.